„Твојот втор живот започнува кога ќе сфатиш дека имаш само еден“ – пролетно размрдување со 3 нови наслови

Човек може да има многу пари, а сепак да биде длабоко несреќен или пак, напротив, да има малку, а да биде врвно среќен, како никој друг… Се согласувате? Ова е само мал исечок од книгата на Рафаела Жордано која треба да се најде на вашата месечна листа на прочитани книги.

Трите наслови кои ги одбравме оваа недела за вас ќе ви дадат нова енергија и малку поинаква перцепција за вашиот живот.

Време е за промени и пролетно размрдување:

Твојот втор живот започнува кога ќе сфатиш дека имаш само еден - Рафаела Жордано

Како да излезете од зачмаеноста и да се вљубите повторно во животот? Што правите кога ќе се заглавите во секојдневната рутина и сфаќате дека животот не ви носи повеќе радост?

Камиј, хероината на овој роман ќе запознае необичен човек со невообичаена професија: рутинолог. Таа повторно ќе ја пронајде мудроста на вистинските избори, простувањето и заборавањето, но и повторното пронаоѓање на љубовта и чудото наречено живот и постоење.

Сестра на месечината: приказната на Тиги – Лусинда Рајли

Историската новела на Лусинда Рајли и сагата за седумте сестри продолжува со приказната на Тиги.

Тиги Д’Аплизе по смртта на нејзиниот татко се преселува во шумските предели во Шкотска, грижејќи се за животниот на огромниот изолиран имот на проблематичниот лорд, Чарли Кинард.

Чили, Циганката којашто долги години живее на имотот ѝ претскажува на Тиги дека таа поседува шесто сетило пренесено од нејзините предци и дека наскоро ќе се врати дома во Гранада, Шпанија.

Во Алхамбра Тиги ги открива своите корени и ја следи патеката кон своето егзотично, но многу сложени минато…

Светлината што ја изгубивме - Џил Сантополо

Луси и Гејб се запознаваат на факултет, на ден што се покажува судбински за двајцата.

Тие се решени дека ќе постигнат нешто значајно и дека ќе направат вистинска разлика во светот и животот на другите луѓе. Повторно се среќаваат една година подоцна и овојпат се чини дека имаат шанса за љубов… но Гејб станува фоторепортер кој добива задача на Блискиот Исток, а Луси гради кариера во Њујорк.

Следува нивното тринаесетгодишно патување исполнето со љубов, соништа, копнеж, но и љубомора и предавство. Кој е одговорен за нашите спојувања и одвојувања? Дали постои судбина или самите сме кројачи на сопствениот живот?

(О)Милена | Црнобело