Фраерски книги што и постарите треба да ги прочитаат

Доста беа сериозни тематики и филозофии. Понекогаш треба да си дадеме простор да се релаксираме со некоја книга за млади, барем да пробаме да го разбудиме детето во себе и на тој начин одново да се почувствуваме млади.

 

Предлог книги за млади кои треба да ги прочитаат и возрасните:

Стаклените деца – Кристина Улсон

Една од најуспешните шведски авторки на криминалистичка фантастика, покрај тоа што пишува за возрасни, сака да раскажува и приказни за помлада публика.

„Стаклените деца“ е нејзината прва книга за деца. И претставува интересна приказна, поврзана со низа мистериозни работи што се случуваат во новиот дом на Били и нејзината мајка.

Били колку повеќе го истражува новиот дом заедно со нејзините пријатели, толку повеќе открива застрашувачки факти за куќата во која живее.

„Стаклените деца“ во 2013 година е добитник на Награда за роман за деца.

Како во филм – Винко Модерндофер

Словенскиот писател, сценарист и режисер е познат како сестран уметник. До сега е автор на збирки раскази, поетски книги, романи, драми, комедии, книги со есеи, како и филмски, телевизиски и театарски режии.

Романот „Како во филм“, кој во 2013 е прогласен за најдобар роман за деца и млади во Словенија, зборува за момчето Гашпер, вљубеник во Интернет и хорор-филмови.

Живее со мајка му Мајда и татко му Јоже, но сите негови денови се пропратени со проблеми со кои секој тинејџер се соочува. По една жестока караница на неговите родители, мајка му ненадејно исчезнува и од тој момент неговиот живот се менува од корен.

Споменка – Горјан Петревски

И третиот предлог е книгата „Споменка“ од Горјан Петревски. Постарата генерација сигурно ја знае оваа книга, но би било навистина добро и да се препрочита.

Сите заедно да се потсетиме на првата љубов на Споменка и Бојан. И како некогаш да уживаме во приказната, како да е лично наша.

Автор: Е.Х. | Црнобело