3 книги кои нема да може да ги оставите додека не ја затворите последната страница

Читањето е храна за умот. Колку повеќе прочитани книги, толку повеќе храна за мозокот. Овој пат нашите три предлози се толку многу „заразни“ што нема да можете да ги оставите додека не ја завршите последната страница.

Одлични за викенди, за одмори или додека се возите кон работното место, еве што вреди да прочитате следно:

Харемот на Гадафи - Аник Кожан

На 15 години, младата Сораја ќе добие покана да го посети Муамер Гадафи, обожуваниот либиски претседател. Пресреќната Сораја не може ниту да претпостави дека пречекорувајќи го прагот на неговата палата, таа всушност влегува во еден од најужасните хареми на модерното време.

Наместо да размислува за својата полуматура, Сораја треба да мисли како да не биде уште еднаш силувана од обожуваниот либиски претседател. Моќна, трогателна и потресна приказна за еден модерен затвор и диктатор од нашата реалност.

Човекот во високиот замок - Филип К. Дик

Спектакуларен роман според кој е направена истоимената популарна ТВ-серија во продукција на Ридли Скот. Филип К. Дик ни дава застрашувачки поглед на алтернативниот свет, во кој еден од сојузниците ја изгубил Втората светска војна.

Во оваа кошмарна дистопија, нацистите го заземаат Њујорк, Јапонците ја контролираат Калифорнија, а африканскиот континент практично не постои. Во неутралната тампон-зона во Америка што го дели светот на двете нови сопернички велесили, живее авторот на илегалниот бестселер.

Продадена - Патриша МекКормик

Лакшими е 13-годишно девојче кое заедно со своето семејство живее во мала колиба на планините во Непал. Иако се очајно сиромашни, животот на Лакшими е убав, среќен и исполнет со едноставни задоволства како прошетки низ планината, играње со нејзината најдобра пријателка и набљудување на момчето за кое е ветена да се омажи кога ќе порасне.

Но, кога безмилосниот хималајски монсун ќе ја уништи и онаа малку посеана земја која ја имаат и ќе ги остави без ништо, очувот на Лакшими вели дека таа мора да замине во градот и да помогне во издржување на семејството.

(О)Милена | Црнобело