Најдобра другарка и најлоша непријателка – 3 моќни книги за вечното женско ривалство

Особено интересни ни се книгите во кои главната тема е женското ривалство. Ова нуди некоја посебна привлечност бидејќи поголемиот дел сме се соочиле со вакви ситуации во реалноста. 

Да се има најдобра другарка која воедно е и најголема непријателка. Да се сака подеднакво многу колку што и се мрази.

Предлагаме три интересни книги кои го разгледуваат феноменот на женското ривалство од различни аспекти:

Мојата генијална другарка – Елена Феранте

Наратор на приказната е 60-годишната Елена, соочена со мистериозното исчезнување на нејзината другарка Лила. Елена и Лила се другарки откако паметат една за друга. Растени во ’50-тите години во суровиот неаполски кварт, двете девојчиња заедно тргнуваат на училиште. Но едната е многу попаметна и поснаодлива од другата.

Патиштата непрестајно им се вкрстуваат во текот на животот. И иако Елена и Лила не можат една со друга, очигледно не можат и една без друга. Моќна приказна за вечното женско ривалство, но и пријателството кое е посилно од сè во животот.

Според истоимениот роман е направена и ТВ серија во италијанска продукција.

Мали жени – Луиза Меј Алкот

Дали сте знаеле дека ликот на Џо е всушност олицетворение на авторката Луиза Меј Алкот? Таа го напишала култниот роман практично „по нарачка“, под притисок на издавачите и нејзиниот татко за само неколку недели.

Испорачала 400 страници испишани со неверојатната приказна за жените во семејството Марч: Џо, Бет, Мег и Ејми. Секако, во фокусот е тивкото ривалство помеѓу Џо и Ејми кое се провлекува во голем дел од животот на помала сестра.

Романот има повеќе екранизации, од кои најактуелна е последната од 2019 година во режија на Грета Гервиг која беше номинирана и за Оскар.

Илјада неверојатни сонца – Халед Хосеини

Ова врвно ремек-дело кое нема да ве остави рамнодушни и без ниту една пуштена солза, раскажува за две жени вовлечени во виорот на бруталноста и војната.

Миријан е копиле, непризнаената ќерка на богат трговец. Откако нејзината мајка ќе се самоубие, таа е принудена да се омажи за Рашид, суров, надмен, шовинист, кој смета дека жените не се вредни за ништо. Пристигнувањето на втората, нова жена на Рашид ѝ отвора нови рани на Миријам откако таа го губи своето бебе.

Лејла е енергична, лута и ја проколнува војната која ѝ одземала сè. А во новата куќа не може да ја поднесе Миријам, ниту пак Миријам не ѝ е наклонета неа. Двете жени се лути сопернички, сè додека не сфатат дека сè што имаат на крајот од денот е себеси и една со друга.

(О)Милена | Црнобело