Три книги со моќни пораки кои ќе ви ги отворат очите во секој аспект од животот

Лаги помеѓу најдобри пријатели. Необичен рецепт за љубов. Урнати соништа под превезот на традицијата. Овие три книги, иако сосема различни, носат неверојатно силни и моќни пораки.

Тие навистина ќе ви ги отворат очите за повеќе аспекти во вашиот живот. Уживајте во читањето:

Седум лаги – Елизабет Кеј

Растејќи, Џејн и Марни споделуваа сè. Тие си ги знаеја своите најдлабоки тајни. Но, кога Марни се вљуби, работите почнаа да се менуваат. Џејн криеше една голема тајна. Таа го мразеше богатиот, необичен сопруг на Марни.

На крајот на краиштата, дури и најдобрите пријатели имаат право да чуваат некои работи за себе. Да беше искрена, сопругот на нејзината најдобра пријателка можеби и денес ќе беше жив … Но, тоа не беше последната лага. Всушност, тоа беше почетокот.

Заеднички стан – Бет О’Лири

Тифи и Леон делат стан. Тифи и Леон делат кревет. Но, Тифи и Леон никогаш не се сретнале.

На Тифи Мур ѝ треба евтин стан, и тоа итно. Леон Туми работи ноќе и му требаат пари. Нивните пријатели мислат дека се луди, но тоа е совршено решение: Леон живее во станот со еден кревет додека Тифи работи преку ден, а таа го има станот преостанатото време.

Со опсесивни поранешни партнери, со комплицирани клиенти на работа, со погрешно обвинет брат и, секако, фактот дека сè уште не се сретнале, тие откриваат дека ако сакаш совршен дом, треба да го фрлиш правилникот низ прозорец.

Модар накит – Катарина Винклер

Филиз е девојче израснато во мало курдско село во Анадолија. На дванаесет години го запознава неколку години постариот Јунус и се вљубува во него. Сонува за заеднички живот во Западна Европа. Набрзо тајно и без дозвола од родителите се венчава со него, но кратко по венчавката се уриваат нејзините соништа дека ќе носи фармерки и ќе живее среќно во Германија.

Наместо фармерки носи бурка, раѓа три деца и доживува физичко и психичко малтретирање од сопругот и од свекрвата. Ниту по мигрирањето во Австрија, животот не ѝ се променува. Дури откако ситуацијата ќе ескалира, на Филиз ѝ успева навидум невозможното: да се ослободи од постојаната тортура во домот.

(О)Милена | Црнобело