Книги поради кои ќе се засакате себеси и животот

Што кога самиот одраз во огледалото ви е одбивен? Што кога не можете повеќе да поднесете да сте во сопствената кожа? Кога животот ве прегазува, кога проблемите се натрупуваат и се чини дека нема никаков излез?

Овие 5 книги ќе ви помогнат да ја пронајдете повторно смислата, да се охрабрите, да се мотивирате и насмеете и да си потврдите дека – вие сте најбитните.

Па затоа е потребно да се засакате прво себеси, а потоа животот и сите останати луѓе:

Храбри наместо совршени – Решма Саџани

Во книгата инспирирана од нејзиното популарно излагање на TED talk, Решма Саџани ги охрабрува жените и девојките да ги прифатат несовршеноста и храброста. Замислете си дека живеете без страв дека не сте доволно добри. Дека не ви е гајле како изгледа вашиот живот на Инстаграм или што мислат комплетните туѓинци за вас.

Замислете си дека лесно се ослободувате од чувството на вина и сте престанале да се раскинувате себеси поради ситни грешки. Што доколку, при соочувањето со секоја одлука, сте го избрале похрабриот пат?

Четириесет правила на љубовтa – Елиф Шафак

Ела Рубинстајн е 40-годишна несреќно омажена домаќинка што добива ангажман да прочита и да напише извештај за Слатко безбожништво – историски роман за судбоносната средба на исламскиот учител Руми и неговиот духовен водач, ексцентричниот дервиш-скитник познат како Шемс од Тебриз.

Притисната од личните проблеми, но и заинтригирана од загадочниот автор Азиз З. Захара – фотограф, светски патник и суфист, таа започнува да се допишува со него. Низ приказната за контроверзното духовно пријателство и улогата на дервишот во длабоката преобразба на Руми во посветен мистик, страстен поет и поборник за љубовта, и самата Ела доживува трансформација, сфаќајќи дека Азиз, исто како Шемс, дошол да ја ослободи.

Спомените на бабичката Лу – Викторија Адамс

Емотивна книга во која се испреплетуваат неколку трогателни животни стории. Паралелно со спомените од минатото на осамената старица Лу следиме две прекрасни и топли љубовни приказни, а ја откриваме и големата тајна од нејзината младост.

Минатото и сегашноста си поигруваат во овој возбудлив роман, оставајќи нè без зборови пред сите животни одлуки и перипетии со кои се соочуваат ликовите. Обични, но исклучителни животи; секојдневни, но посебни луѓе; различни животни судбини поврзани низ спомените на една добродушна бабичка.

Овој живот од триесет и некоја – Џон Ренс

Хари Спенсер е наставник по историја кој обожува грицки и е престрашен поради стареењето. Кога неговата жена Емили ќе му соопшти дека е бремена, Хари e втурнат во улогата на иден татко, иако воопшто не е подготвен за тоа.

Искрен, пријатен и духовит, ова е дневник за едно невешто патување на мажот кон зрелоста. Романтична комедија за секој кој е, или кој еден ден веројатно ќе порасне.

Твојот втор живот започнува кога ќе сфатиш дека имаш само еден – Рафаела Жордано

Во еден преломен момент Камиј, хероината на овој волшебен роман, среќава необичен човек со уште понеобично занимање: рутинолог. Од него таа повторно ќе ја открие мудроста на вистинските избори, на заборавањето и прошката.

Зашто „животот е како летачки балон што се издига со помош на топол воздух. За да се искачиш повисоко, треба да умееш да се ослободиш од товарот и да исфрлиш преку оградата сè што ти пречи да се кренеш“.

(О)Милена | Црнобело