Три одлични книги за сите кои се почувствувале несреќно во љубовта

Речиси сите во одреден период во животот сме се почувствувале несреќно во љубовта… тоа е сосема нормално и човечки.

Овие три книги ќе ви ја вратат насмевката на лицето и вербата во љубовта, колку невозможно и да ви изгледа тоа:

Меден месец – Кристина Лорен

Олив Торес е навикната да биде баксузната близначка. Од необјасниви несреќи до неодамнешно отпуштање, нејзиниот живот се чини дека е речиси трагикомичен.

Спротивно на тоа, сестра ѝ е вечна шампионка, која успева да ја плати својата свадба победувајќи на многу наградни игри.

За Олив, единственото нешто што е полошо од постојаната лоша среќа е денот на венчавката да го поминете со кумот (својот најголем непријател), Итан Томас. Олив се подготвува за свадбен пекол, решена да го помине со „монтирана“, лажна насмевка на лицето.

Сурова љубов – Колин Хувер

Кога Тејт Колинс го запознава пилотот Мајлс Арчер, знае дека тоа не е љубов на прв поглед. Тие не можат да се однесуваат дури ни како пријатели. Единственото заедничко нешто им е непобитната заемна привлечност.

Тој не сака љубов, таа нема време за љубов, па им останува само сексот. И нивниот договор може да е незамисливо едноставен ако Тејт успее да се држи до единствените две правила што Мајлс ги има за неа. Никогаш не поставувај прашања за минатото. И не очекувај никаква иднина.

Мирисот на листовите чај – Дајна Џефрис

Сместена во дваесеттите години на минатиот век, приказната ја следи младата Англичанка Гвен, која има среќа да ја сретне љубовта на својот живот – русокосиот сопственик на плантажа од Цејлон (денес Шри Ланка).

Таа доаѓа со пароброд на островот за да стапи во брак што ветува долг и мирен живот среде високите зелени ридови со чај. Но Лоренс е постојано на работа, а неговата млада сопруга мора сама да ја истражува плантажата. Талкајќи по забранетите места, Гвен наоѓа заклучена врата и едно премолчено минато.

(О)Милена | Црнобело