Три нови трилери кои ќе ве „извадат од кожа“

Дел од читателите се вљубени во жанрот трилер од причина што ваквите книги се секогаш „лудо возење“, исполнети со многу адреналин, доза мистерија и загатки. А кога заплетот е совршен, останува само да си направиме „филм“ во главите и жедно да ги вртиме страниците една по друга.

Овие трилери ќе ве „извадат“ од кожа, а долго време нема да може да ги извадите од умот:

Анатомија на скандалот – Сара Вон

Софи Вајтхаус има прекрасен дом, две прекрасни деца и привлечен, успешен маж. Со други зборови, има совршен живот.

Но, сè се менува една ноќ кога нејзиниот сопруг Џејмс доаѓа дома и ѝ признава дека ја изневерил. Одеднаш нејзиниот смирен, уреден свет, се превртува наопаку. Дали навистина го познава човекот за кој се омажила?

Признанието на Џејмс е само врвот на ледената санта. Обвинет е за ужасно злосторство. Но вистината е уште пострашна отколку што некој би можел да замисли.

Дали Џејмс е виновен или е само невина жртва на злобен план? Оваа книга е екранизирана во ТВ серија во продукција на Нетфликс.

Детето што сакаше елени – Самуел Бјорк

Зима, 1996 година. Еден пензионер вози низ планините со својот автомобил. Одеднаш забележува нешто пред себе и нагло закочува.

Фаровите фрлаат светлина врз снегот на патот каде што стои преплашено дете со помодрени усни и со еленски рогови на главата.

14 години подоцна, во планинското езеро недалеку оттука, пронајдена е мртва девојка. Во балетски костим, а близу до неа стои и фотоапарат на статив.

За една недела ќе се случат уште две убиства. Убиецот остава насоки за полицијата, што водат во игра во која не може да победат.

Аурис – Себастијан Фицек, Винсент Клиш

И најмалото отстапување во звукот и фреквенцијата на гласот е доволно за познатиот форензички фонетичар и вистинска легенда во редовите на полицијата, Матијас Хегел, да ја разликува вистината од лагата. Со негова помош веќе се осудени бројни криминалци.

Дали тој сега се лаже себеси? Неговото признание дека брутално убил бездомничка во жестока расправија изгледа премногу искрено.

Амбициозната поткастерка која обработува вистински злосторства, Јула Анзорге, е своевиден експерт за рехабилитација на невини осуденици и очајно сака да ја открие вистината.

Но кога ќе почне да се задлабочува во случајот на Хегел, таа свесно се става во голема опасност…

(О)Милена | Црнобело