Ана и Алексеј од Битола ја преработија безвременската „Немир“ од Каролина и Тоше (видео)

Младите талентирани музичари Ана Ванчевска и Алексеј Ивановски од Битола, кои ја претставуваа Македонија на Детската Евровизија 2024, објавија нова преработка на безвременскиот хит „Немир“, во оригинална изведба на Тоше Проески и Каролина Гочева.

Иако веќе се препознатливи по своите настапи и авторски музички проекти, овој пат решија да ѝ дадат нов живот на една од најубавите македонски балади.

„Постојат песни што не се само музика, туку емоција што трае. Ја одбравме „Немир“ затоа што веруваме дека вистинските песни заслужуваат повторно да бидат слушнати и почувствувани.

Ова е композиција што и денес ја носи истата емоција и сила како и кога беше создадена. Со голема почит кон оригиналната изведба на Тоше Проески и Каролина Гочева, сакавме да ѝ дадеме наше музичко видување, притоа зачувувајќи ја искреноста и пораката што ја носи.

Се надеваме дека преку оваа изведба ќе придонесеме оваа прекрасна песна да продолжи да живее и да допре до нова публика, затоа што добрата музика е безвременска,“ велат тие.

Со оваа преработка, Ана и Алексеј продолжуваат да ја градат својата музичка приказна, покажувајќи дека покрај создавањето нова музика, со голема почит се навраќаат и на највредните дела од македонската музичка сцена, носејќи ги поблиску до младата публика.

Кликнете и погледнете го видеото: