Пријанка Чопра: „Ги замрзнав јајце-клетките за да знам дека еден ден ќе бидам мајка дури и да не најдам партнер“

Детали

четврток, 30 март 2023

„Отсекогаш знаев дека сакам да имам деца. Мислам дека тоа никогаш не беше прашање за кое размислував. Повеќе ми беше страв дали ќе најдам маж со кој ќе можам да делам сè, па и родителските обврски“, рече во интервју поранешната Мис на светот, Пријанка Чопра, и прозборе за мајчинството и низ што сè поминала пред да го запознае сопругот Ник Џонас.

Холивудската ѕвезда и поранешна Мис на светот, Пријанка Чопра, во поткастот на Декс Шепард „Armchair Expert“, отворено зборуваше за мајчинството, но и за животната лекција што ја научила од моментот кога замрзнала неколку јајце-клетки и решила целосно да се посвети на себе и на својата кариера.

Една година откако стана мајка, Пријанка Чопра искрено одговараше на прашања поврзани со нејзината ќерка, Малти Мари Чопра Џонас, но и за својата одлука да замрзне јајце-клетки во своите рани 30-ти години.

Актерката вели дека никогаш не размислувала за тоа дали сака да има деца или не. Таа уште пред да наполни 30 години била цврсто решена еден ден да стане мајка.

„Отсекогаш знаев дека сакам да имам деца. Мислам дека тоа никогаш не беше прашање за кое размислував.

Повеќе ми беше страв дали ќе најдам маж со кој ќе можам да делам сè, па и родителските обврски.

Мора да бидете сигурни дека ќе сакате да го поминете целиот живот со партнерот со кој ќе решите да имате деца“ – рече Пријанка во интервјуто.

Таа призна дека додека го барала вистинскиот маж, често била анксиозна. Токму затоа и не била сигурна дека сака да почне врска со Ник Џонас, кој сега ѝ е сопруг, но е 10 години помлад од неа.

„Кога почнавме да комуницираме во 2018 година, неговите години ми беа проблем, не го гледав како потенцијален маж со кој би можела да oсновам семејство.

Си мислев: 'па не знам дали тој сака да има деца на 25 години' (колку што имаше кога ја почнавме врската). А јас секогаш сакав деца. Обожавам деца“ – вели Чопра.

Пред да го запознае Ник, Пријанка решила да го послуша советот на својата мајка и да замрзне неколку јајце-клетки.

Со тоа, вели, самата на себе си дала повеќе време да го преиспита својот живот и да го најде вистинскиот партнер.

„На сите мои помлади пријателки им велам дека биолошкиот часовник не е мит.

Многу е потешко да забремените по 35-тата година и да го износите бебето до крај, посебно жените што работеле целиот свој живот“.

Иако Пријанка вели дека процедурата е скапа и не може да си ја дозволи секој, сепак, вреди да се проба.

„Тоа е најдобриот подарок што една жена може да си го даде себеси.

Така му ја одземате моќта на биолошкиот часовник и можете да работите и уживате додека сакате, пред да станете мајка.

Вашите јајце-клетки и после многу години ќе бидат млади како на денот кога ги замрзнавте“ – додава таа.

Прочитајте и „Каде беше целиот мој живот“ - Љубовта на Пријанка Чопра и Ник Џонас ги надминува разликата во години и религијата

А. Ј. | Црнобело