Албанија прва влезе во финале, Словенија последна – Познати новите 10 финалисти на Евровизија 2023

Детали

четврток, 11 мај 2023

Албанските преставници Албина и фамилија Келменди се првите што обезбедија учество на финалната вечер на Евровизија 2023. Погледнете кои земји одат понатаму?

Вечерва се одржа втората полуфинална вечер од Евровизија 2023. На сцената настапија уште 16 земји учеснички кои се надеваа дека ќе обезбедат пласман во големото финале што ќе се одржи во сабота (13.05).

Од земјите во соседството вечерва настапија Грција, Словенија и Албанија, а Македонија годинава не настапува на престижниот музички настан.

Претставничките на Австрија Теја и Салена „го оживеаја“ познатиот писател Едгар Алан По на сцената, Словенците „Џокер Аут“ ги украдоа воздишките на голем број дами ширум светот.

Посебно привлече внимание и театарот со драг кралици што беа облечени во слични аутфити како трите водителки на Евровизија, кои настапија додека се исчекуваа резултатите од гласањето.

Албанија е првата земја што влезе во финале, по неа влегоа Кипар, Естонија, Белгија, Австрија, Литванија, Полска, Австралија, Ерменија и Словенија.

Како што може да се забележи, грчкиот претставник не успеа да обезбеди учество во финалето.

Заедно со останатите 10 земји што обезбедија пласман во вторникот и шесте земји што директно одат во финалето, на сцената во сабота ќе настапат вкупно 26 земји.

Б. С. Б. | Црнобело