„Ќе ја научиш ли ќерка ти да не биде како тебе?“ – Парис Хилтон критикувана затоа што ќе снима реално шоу со децата

Детали

вторник, 28 ноември 2023

„Ќе покажеш ли и колку дадилки имаш?“, „Како не ти е срам да се фалиш дека си добра мајка?“ – ја прашуваат твитерџиите Парис Хилтон, откако таа најави дека со нејзините две деца ќе снима реално шоу и ќе му покаже на целиот свет колку добра мајка е и дека сама менува пелени.

Парис Хилтон ги изненади сите кога се пофали дека на Денот на благодарноста, таа и нејзиниот сопруг станаа родители на девојче добиено со сурогат мајка, на кое му го дадоа името Лондон.

Таа даде ексклузивно интервју за магазинот People, каде најави дека во втората сезона од нејзиното реално шоу Paris in Love ќе покаже дека е вистински добра мајка.

„Превозбудена сум што ќе ги прославиме првите заеднички празници заедно. Денот на благодарноста беше прекрасен затоа што ги изненадивме сите со Лондон, а Феникс за првпат ја виде новогодишната елка.

Волшебно беше чувството кога видов како му светкаа очињата. Не можам да дочекам да го поминеме нашиот прв Божиќ заедно како семејство“ – рече Парис.

Богатата наследничка вели дека празниците секогаш ѝ биле мошне важни, а дека сега се чувствува уште посреќна затоа што конечно има свое семејство со кое ќе ги помине.

Во однос на новото реално шоу, Парис најави што може да очекуваат нејзините обожаватели:

„Многу сум возбудена што моите обожаватели ќе ја видат оваа нова етапа од мојот живот, каква сум како сопруга и мајка.

Ќе имате можност да го видите мојот секојдневен живот и да сфатите дека јас сум забавна мајка, која има многу љубов во себе и работи напорно“ – вели таа и додава дека публиката ќе може да види дека и таа се чувствува виновна понекогаш затоа што не е доволно добра мајка, но и да види како менува пелена.

Интервјуто масовно се споделува на социјалните мрежи, а твитерџиите побрзаа да ја прашаат:

„Ќе ги покажеш ли и дадилките што се грижат за твоите деца?“;

„Се надевам дека ќе ја научи ќерка ѝ да не биде како неа“;

„Направи сѐ и сешто и сега е среќна мајка“;

„Како може да се фали дека е добра мајка? Нели сите знаеме дека е зависничка од опојни супстанци?“ – стои во дел од коментарите на Твитер.

 Б. С. Б. | Црнобело