Тејлор Свифт ги откажа концертите во Виена: „Страв ми е дека ќе бидам жртва на терористички напад“

Детали

четврток, 08 август 2024

„По бомбашките напади во Лондон и Вегас, бев уплашена да заминам на турнеја“ – изјави во една пригода Тејлор Свифт, која сега откажа 3 концерти во Виена, откако беше утврдено дека исламистички радикали планирале терористички напади на стадионот, а беше уапсено и 19-годишно момче со потекло од Македонија.

Поради безбедносни закани Тејлор Свифт беше приморана да откаже 3 концерти кои беа закажани во Виена, Австрија, кои се дел од нејзината светска турнеја Eras.

На големо разочарување на фановите, концертите на Тејлор Свифт кои беа закажани за денес, четврток (08.08), петок и сабота на стадионот Ernst Happel, се откажани, откако во средата биле упасени две лица кои планирале Исламистички напади на големи настани во главниот град во Австрија.

„Заради потврдата добиена од властите дека се планирани теористички напади на стадионот Ernst Happel, немавме друг избор освен да ги откажеме концертите заради безбедноста на сите.

Парите за билетите ќе бидат автоматски рефундирани во тек на наредните 10 работни дена“ – соопштија организаторите на концертот.

Според соопштенијата од австриските власти, 19-годишен австриски државјанин бил уапсен во градот Терниц, а било уапсено уште едно лице во Виена.

Весникот Kronen Zeitung, пишува дека станува збор за младо момче кое потекнува од Македонија.

Двете лица добиле радикалистички идеи преку интернет, а 19-годишното момче дало завет за лојалност на Исламска држава на почетокот на минатиот месец.

Инаку, концерите на Тејлор Свифт требаше да привлечат голем број посетители и туристи, кои ќе имаа можност одблиску да го погледнат настапот на најголемата поп-ѕвезда на денешницата.

Според очекувањата, предвидено било дневно на секој концерт да има околу 65.000 посетители на стадионот и уште 22.000 обожаватели надвор од стадионот.

Веста за откажувањето на концертите, многумина ги наврати на изјавата на поп-ѕвездата, која таа ја даде во 2019-та година.

По бомбашките напади што се случија на концертот на Аријана Гранде во Манчестер во 2017-та година и масакрот на Harvest Music Festival во Лас Вегас, Тејлор изјави дека стравува од напади.

„Мојот најголем страв. По бомбашките напади во арената во Манчестер и масакрот во Вегас, бев целосно уплашена да заминам на турнеја затоа што не знаев како ќе успееме да се погрижиме за безбедноста на 3 милиони луѓе во период од 7 месеци.

Поминавме многу време за планирање, пари и труд за да ја обезбедиме безбедноста на фановите. Мојот страв од насилство се отсликува и во мојот личен живот“ – изјави Тејлор пред почетокот на нејзината турнеја „Reputation“ во 2019-та година.

По ова станува јасно зошто пејачката сериозно ги сфатила заканите и веднаш одлучила дека е подобро нејзините концерти воопшто да не се одржат, отколку да има голем број невини жртви.

Б. С. Б. | Црнобело / фото: depositphotos.com