„Мајка ми постојано беше бремена, а јас се грижев за децата“: Факти за Сузан Сарандон (што сигурно не сте ги знаеле)

Се соочила со полова дискриминација уште на почетокот на кариерата

Денес актерките отворено зборуваат за дискриминацијата, па и малтретирањето што ги имаат преживеано во Холивуд.

Кариерата на Сузан почнала долго пред актерките да добијат глас, па и самата била жртва.

Дури денес актерката почна да зборува за фактот дека секогаш ѝ нуделе помала плата од машките колеги, дури и кога таа била главниот лик.

Притоа, кариерата секогаш „ѝ висела на конец“ бидејќи никој не сакал да најмува актерки кои остареле барем малку.

Суптилно, Сузан има спомнато и дека експлоатацијата, некогаш и сексуална, била честа појава и дека ова е нешто што не се променило многу.

„Ние, жените во Холивуд, не сакаме да бидеме експлоатирани и да имаме луѓе како Харви Вајнштајн од кои ни зависи кариерата“.

Беше банирана од Оскари бидејќи сподели свое мислење

Сузан нема „влакна на јазикот“, особено кога станува збор за проблематични теми.

Во 1993 година, Сузан презентираше награда на Оскарите и ја искористи можноста да зборува за ХИВ позитивни бегалци кои биле затворени во Гуантанамо Беј – еден од најозлогласените затвори во светот кој се наоѓа во Куба, а е во сопственост на САД.

Во говорот, таа ги замоли надлежните да не ги третираат ХИВ позитивните бегалци како криминалци.

Актерката доби аплауз од публиката, но организаторите привремено ја банираа од Оскарите.

По две децении, се раздели од љубовта на нејзиниот живот

Сузан Сарандон и Тим Робинс беа заедно повеќе од две децении, и иако важеа за еден од најсреќните парови, сепак се разделија.

Тие се запознаа на сетот на Bull Durham, почнаа врска и околу една година подоцна, добија дете.

Добија и уште две деца, но никогаш не се венчаа.

Иако беа среќни, сепак, во 2009-та се разделија.

„Пробувавме да одржиме некаков статус-кво, но тоа не функционира, бидејќи не можеме да контролираме некој друг.

Водевме битка која знаеме дека ја губиме“, изјави актерката.

Таа истакна и дека врската со колега е особено тешка, посебно кога имаат и деца.

Го изгуби брат ѝ

Во 2016-та, на само 55-годишна возраст, почина едниот од браќата на Сузан од инфаркт.

Неговата смрт била особено тешка за Сузан бидејќи, како што веќе спомнавме, таа сама се грижела за нејзините браќа и сестри и практично им била како мајка.

Спирова С. | Црнобело