„Признавам страшно е“ – Кејт Мидлтон за појавувањето пред болница неколку часа по породување
- Детали
- понеделник, 17 февруари 2020
Историски момент за светот, но страшен момент за жената која само што станала мајка. Веројатна вака се чувствувала Кејт Мидлтон, па дури и Дијана, кога првпат ги покажуваа децата пред светот.
На 22 јули 2013-та, Кејт Мидлтон излезе од лондонската болница St. Mary со широка насмевка и бебе во нејзините раце. Но, изгледа зад насмевката се криел и страв.
Војвотката од Кембриџ има три деца – Џорџ, кој се роди во 2013-та, Шарлот, која се роди во 2015-та, и најмалото, Луис, кое се роди во 2018-та.
После секое породување, таа и Вилијам им го претставуваа новиот член на кралското семејство на сите, и тоа пред скалите на болницата неколку часа по породувањето.
Сите, а веројатно и вие се имате запрашано како ѝ било на Кејт во тој момент. Војвотката реши да сподели како изгледало да се стои пред толпа луѓе со првото новороденче во рацете.
Во подкаст со Џоана Флечер, на Кејт ѝ беше поставено прашањето:
„Какво беше чувството да знаеш дека надвор има толку многу луѓе веднаш после твоето породување, а ти си со твоето ново семејство?“
На што војвотката одговори:
„Малку застрашувачко, нема да лажам. Сите ми даваа голема поддршка, а и јас и Вилијам бевме свесни дека ова е нешто за коешто се возбудени сите, и сме многу благодарни за поддршката од јавноста и за можноста да ја споделиме радоста со нив.
Но, ова беше во комбинација со новороденче и неискусни родители, и несигурност за она што ќе се случи. Па, имаше многу измешани емоции.“
Британското кралско семејство со години ја користи истата болница за кралските породувања.
Покрај трите деца на Кејт, овде беа родени и принцовите Хари и Вилијам.
Меган Маркл прва ја прекрши 40-годишната традицијата, кога се породи со Арчи во 2019-та.
Таа и Хари одбраа болница поблиску до нивниот дом, а првото појавување на Арчи беше во замокот Виндзор.
Спирова С. | Црнобело