„Не се откажувам“ – Шенон Доерти сака да се збогува со најблиските, но верува дека уште е рано за тоа

Детали

четврток, 01 октомври 2020

Шенон Доерти води битка со ракот на дојката, и иако сака да им напише писма и да сними видео пораки за нејзините најблиски, сè уште не е подготвена на тоа, бидејќи верува дека има уште многу години живот.

Пред околу 3 години, актерката Шенон Доерти заврши со терапијата за ракот на дојката. Но, во 2019-та, нејзиниот лекар ѝ соопштил дека ракот се вратил, овојпат во четврти стадиум. Односно, ракот веќе почнал да се проширува и на другите делови од телото.

Во неодамнешно интервју за Elle, актерката отворено прозбори за болеста и, најважно од сè, нагласи дека се чувствува добро и дека сигурно ќе живее барем уште 10 години.

49-годишната актерка сакала да сними и видео пораки за нејзините сакани, кои ќе можат да ги погледнат по нејзината смрт. Но, вели дека уште не сака да почне со тоа бидејќи не губи надеж.

„Немам седнато да напишам писма. Тоа е нешто што треба да го направам. Има нешта што сакам да ѝ ги кажам на мајка ми. Сакам сопругот да знае колку ми значи. Но секогаш кога доаѓа време да го направам тоа, ми се чини како да е крај. Се чувствувам како да се откажувам, а јас не се откажувам“.

Иако Шенон најверојатно целиот живот ќе треба да прима терапија за болеста, таа вели дека не ја очекува смртта.

„Се чувствувам како многу, многу здраво човечко суштество. Тешко е да се збогувате со сè кога чувствувате дека ќе живеете уште 10 или 15 години“, изјави таа за Elle.

Засега, актерката вели дека сака да се фокусира на убавите нешта во нејзиниот живот:

„Се обидувам да ги ценам малите моменти кои повеќето луѓе не ги забележуваат или ги земаат здраво за готово. Малите нешта мене ми изгледаат големо. Сите го имаме овој бунар без дно во нас, и треба да продолжиме да копаме во тој бунар за да ја најдеме силата да се соочиме со неправдата – и така можеме да ја видиме и целата убавина“.

Шенон призна и дека, нормално, имало денови кога се чувствувала депресивно, но успевала да ги надмине тие мигови со помошта од нејзините најблиски.

Таа сподели и фотографија на Instagram која е дел од фотосесијата за Elle, со извадок од интервјуто:

„Во 2015-та, Шенон Доерти стана една од приближно 300.000 жени од Америка кои секоја година се дијагностицирани со рак на дојката. Во повеќето случаи, првата терапија е ефикасна и го лекува пациентот. Но во многу други случаи, ракот на дојката се враќа. Во 2019-та, ракот на Доерти се врати како метастазен (познат и како рак во четврти стадиум). Додека некои го гледаат ова како смртна казна, Доерти го гледа како можност“.

Во описот, Шенон споделува и нејзина изјава:

„Имам уште многу живот пред мене“.

Спирова С. | Црнобело