„Размислував за самоубиство, слушав гласови, секое утро плачев од болка“: Селена Гомез отворено за бројните проблеми со здравјето

Детали

петок, 04 ноември 2022

Во интервју за Rolling Stone, но и во нејзиниот нов документарец насловен My Mind & Me, Селена Гомез се отвори за проблемите со здравјето – дијагнозата за лупус, биполарното нарушување, како и најмрачниот период од животот кога дури размислувала и за самоубиство.

Лупус е болест која може да има влијание врз секој орган во телото, а симптомите варираат од личност до личност. Некогаш симптомите можат да се повлечат на извесен период, за потоа повторно да се вратат.

Дел од симптомите се болки во мускулите и зглобовите, треска, осип, болка во градите, паѓање на косата, проблеми со бубрезите, екстремен замор…

Во новиот документарец на Селена Гомез има сцени од пејачката од периодот кога нејзините симптоми на лупус се влошуваат, поради што таа плаче.

Пејачката вели дека битката со оваа автоимуна болест е една од најтешките во нејзиниот живот бидејќи чувствувала речиси неподнослива болка.

„Немав почувствувано симптоми. Сега само ме боли. Наутро, кога се будам, веднаш почнувам да плачам бидејќи сè ме боли“.

Во една сцена, лекарот ѝ кажува на младата пејачка дека болката ѝ е предизвикана од лупус, но и од друго нарушување кое предизвикува болка и слабост во мускулите.

Потоа тој ѝ дава и лек што наводно треба да ѝ помогне со болките во зглобовите за околу една година.

„Секогаш се чувствувам добро кога ги знам одговорите, но ми беше многу тешко да го примам лекот последниот пат. Третманот трае четири, пет часа. На почетокот ви го оптоварува целиот систем, но во ред е“, вели Селена.

Во документарецот има сцени каде што Селена прима и лек за релаксација бидејќи никако не можела да се смири.

Младата пејачка беше дијагностицирана со лупус во 2015 година и примаше терапија. Во 2017-та беше хоспитализирана бидејќи едниот бубрег престанал да ѝ работи поради болеста.

Пејачката имаше трансплантација на бубрег, а донор беше нејзината пријателка Франсија Раиса.

Во новото интервју за Rolling Stone, Селена зборува за биполарното нарушување и открива дека поради лековите, најверојатно никогаш нема да може да има деца.

„Ова е многу големо нешто во мојот живот. Но, верувам дека еден ден треба да имам деца, и ќе имам“.

Таа вели и дека дознала за овој проблем во период кога нејзина пријателка пробувала да остане бремена. Поради ова, се чувствувала уште полошо.

Всушност, во документарецот има и сцена каде што Селена плаче во автомобилот по средба со пријателка.

Пред да ја добие дијагнозата за биполарното нарушување, Селена имала психоза која ѝ предизвикувала суицидни мисли.

„Мислев дека светот ќе биде подобро место без мене“.

Сепак, пејачката истакнува дека никогаш не пробала да си го одземе животот, а во периодот кога ги имала овие мисли добила дијагноза за биполарно нарушување.

Таа била во четири здравствени установи обидувајќи се да си го среди менталното здравје.

„Ќе бидам многу отворена за ова – бев во четири установи. Мислам дека во раните 20-ти нештата стануваа многу мрачни.

Тогаш почнав да чувствувам дека немам контрола над моите чувства, без разлика дали беа многу добри или многу лоши“.

Пејачката имала драстични промени на расположението – од екстремна среќа, до ужасна депресија – кои некогаш траеле со недели, па дури и месеци. Уште полошо што никогаш не можела да ја најде причината за овие емоции.

Продолжува на следната страница...