Се венчаа во казино, актерот ќе остави само 1 милион за нивните ќерки – Како Брус Вилис и Деми Мур се добри пријатели и по разводот?

Детали

четврток, 15 декември 2022

Иако се разделени уште од 1998 година, Деми Мур и Брус Вилис се одлични пријатели и се заедно во најтешките мигови од животот на актерот. Како успеваат во ова, но и зошто актерот ќе им остави само 1 милион долари на нивните три ќерки, а сето останато богатство на сегашната сопруга и двете деца со неа?

Поминаа неколку месеци откако јавноста дозна дека Брус Вилис има афазија – болест која има влијание врз способноста за говор, па дури и за разбирање на јазикот.

За болеста нема лек, а состојбата на актерот само се влошува.

Сега тој минува најмногу време со семејството, вклучувајќи ја и бившата сопруга Деми Мур, а според извори блиски до актерот, сите се молат за „божиќно чудо“ и не губат надеж дека неговата состојба можеби ќе се подобри.

Иако Брус Вилис е во брак со Ема, поранешната сопруга Деми Мур има важен дел во неговиот живот и се чини дека минува сè повеќе време со него.

Изминативе неколку месеци, Деми и Брус се речиси постојано заедно, како и со нивните три деца. Нормално, овде е и сегашната сопруга на Брус, како и двете деца што ги доби со неа.

Според Radar Online, кратко пред да ја добие дијагнозата за болеста, Брус Вилис направил промени во тестаментот.

Богатството на актерот изнесува 250 милиони долари, но на ќерките што ги доби со Деми Мур, им оставил по само еден милион.

Radar Online споделува дека сите останати пари ќе одат кај сегашната сопруга и нивните две деца – Мејбл (10) и Евелин (8).

„Брус сака да се осигури дека најмалите членови од неговото семејство ќе бидат обезбедени за живот. Тој смета дека Румер, Скаут и Талула имаат добиено многу финансиска помош од него во текот на животот.

Всушност, Брус го промени тестаментот по венчавката со Ема во 2009-та, а потоа повторно кога им се родија децата. Сега повторно го промени, откако сфати дека му се влошува здравјето“.

Наводно, актерот бил убеден дека трите возрасни ќерки ќе можат да се снајдат и без неговите пари бидејќи веќе имаат свои кариери.

„Брус верува и дека Деми, која има 200 милиони, секогаш ќе биде овде за Румер, Скаут и Талула“.

Веројатно Деми Мур се согласува со ова и продолжува да биде дел од животот на актерот.

Но, сигурно се прашувате како актерите успеаја да го задржат пријателскиот однос по разводот.

Брус и Деми се запознаа во 1987 година на премиера и почнаа да се гледаат речиси веднаш.

Тие се венчаа во ноември 1987-ма, во казино во Лас Вегас, по само три месеци заедно.

„Се движевме низ казиното кога Брус рече дека би требало да се венчаме. Се шегувавме за тоа додека бевме во авионот, но одеднаш изгледаше како да не се шегува“, откри актерката во нејзините мемоари.

Во 1988 година тие ја добија најстарата ќерка – Румер. Во 1991 им се роди Скаут, а во 1994 година ја добија Талула.

Во 1998-ма, по десет години заедно, актерите открија дека се разделуваат. Нивниот развод беше финализиран во 2000 година.

Тогаш актерот прозборе за нивното пријателство по разводот и желбата да бидат добри родители на нивните деца.

„Уште ја сакам Деми. Многу сме блиски. Имаме три деца за кои ќе продолжиме да се грижиме заедно, и веројатно сега сме поблиски од кога било. Нашето пријателство продолжува“.

И покрај тоа што беа разделени, на Брус Вилис не му било сеедно кога Деми почна да се гледа со Ештон Кучер. Наводно, актерот бил многу љубоморен, а Вил Смит му помогнал да ги надмине овие чувства.

„Во некои од најмрачните мигови, Вил ми рече: ’Мора да им покажеш на децата дека е во ред да имате други партнери‘. И тогаш како да се освестив. Па, Вил, ти благодарам“, изјави актерот во интервју.

Околу десет години по разводот, Брус остана сингл, сè до 2009 година кога се венча со Ема. На свадбата беа поканети и Деми и Ештон.

„Станавме како племе. Многу луѓе се заинтересирани бидејќи сите ги разбираат одбивноста и љубомората кога завршува некој брак. Но, не разбираат како можам да сум во толку добар односот со бившата“, сподели Брус.

И Ема има прозборено за целата ситуација, изјавувајќи дека секогаш ѝ било пријатно кога Деми била со нив.

Во 2011 година Деми и Ештон се разделија, а истиот период, Брус Вилис и Ема ја добија првата ќерка.

А, Деми и Брус го продолжија нивното пријателство.

„Секогаш се трудеа да бидеме заедно на сите семејни настани. Се трудеа да бидеме едно семејство, а не две посебни, и мислам дека ова има позитивно влијание врз нас“, изјави ќерка им Румер.

Можеби најнеобично во нивниот однос е што Деми Мур и Брус Вилис заедно поминаа четири недели во карантин за време на пандемијата.

За јавноста беше чудно зошто актерите се сами, без сопругата на Брус и нивните мали деца, но Скаут Вилис даде објаснување.

Имено, и тие требало да бидат со нив, но едната ќеркичка се повредила, па морале итно да одат во болница.

Деми Мур продолжува да биде покрај Брус дури и во најмрачниот период од неговиот живот, па сега минуваат многу време заедно.

Актерката е дел од сегашното семејство на Брус, а беше потпишана и на официјалната изјава за болеста на актерот, заедно со Ема и петте деца.

Деми Мур и Брус Вилис дефинитивно се одличен пример за тоа како треба да функционира разделен пар со заеднички деца.

Спирова С. | Црнобело