Парис Хилтон го доби првото дете од сурогат мајка, 2 месеца откако откри дека има проблеми со неплодност

Детали

среда, 25 јануари 2023

Парис Хилтон пријатно ја изненади јавноста со веста дека со сопругот добиле син со помош на сурогат мајка. Пред само два месеца, мајка ѝ откри дека парот има проблеми со неплодност, по што Парис се разгневи и само спомна дека ќе стане мајка во 2023-та.

Парис Хилтон и сопругот Картер Реум го добија првото дете со сурогат мајка.

41-годишната богаташка ги сподели вестите со слатка фотка на Инстаграм, со опис:

„Веќе си сакан повеќе отколку што можат да кажат зборовите“.

„Отсекогаш сум сонувала да бидам мајка и многу сум среќна што се најдовме со Картер. Возбудени сме што основавме семејство и срцата ни експлодираат од љубов за нашето момче“, изјави Парис за People.

Приновата на Парис Хилтон е вистинско изненадување за јавноста бидејќи пред само два месеца, нејзината мајка сподели дека ќерка ѝ пробува да остане бремена, но со Картер имаат проблеми со неплодност.

Парис се разгневи на оваа изјава ѝ рече дека со Картер планираат да станат родители во 2023-та. Сепак, таа не откри дека всушност веќе чекале да се роди детето.

Прочитајте повеќе: Мајката на Парис Хилтон: „Ќерка ми се мачи да остане бремена, но не успева – ми се крши срцето“

Во декември, Парис сподели дека се обидувала да забремени со асистирано оплодување во пикот на пандемијата. Но, ни тогаш не спомна дека процедурата била успешна со сурогат мајка.

„Почнавме да се обидуваме неколку месеци бидејќи светот беше затворен. Знаевме дека сакаме семејство, и само реков: ’Ова е совршен тајминг. Обично минувам 250 дена од годината во авион, па ајде да ги подготвиме јајце клетките‘, и сега имаме многу кои нè чекаат“, изјави Парис за People.

Ова е првото дете на Парис, но нејзиниот сопруг веќе има 10-годишна ќерка со ријалити ѕвездата Лора Белизи.

Но, наводно, тој нема никаков контакт со неа и ја видел само еднаш во животот. Сепак, тој ѝ помагал на мајката финансиски и не планирал да запре со тоа, без разлика што не ја гледа ќерка му.

Парис и Реум се верија во февруари 2021 година, по околу една година врска. Во ноември истата година се венчаа, а прославата траеше три дена.

„Многу сакам да сум во брак. Се чувствувам како конечно да го најдов совршениот партнер и се чувствувам многу безбедно. Конечно го имам мојот дом и едвај чекам да имаме деца“, изјави Парис за саканиот кратко по свадбата.

Спирова С. | Црнобело