Кристијано Роналдо за смртта на Диого Жота: „Бев со Џорџина кога дознав, плачев многу, но не се каам што не бев на погребот“

Детали

петок, 07 ноември 2025

Португалскиот фудбалер Диого Жота (28) и неговиот брат Андре (26) загинаа во сообраќајка во јули 2025, а голем дел од јавноста до денес го осудува Кристијано Роналдо што не се појави на погребот на својот соиграч.

Кристијано Роналдо, најдобриот португалски фудбалер, но и еден од најдобрите во светот, ретко дава интервјуа. Сепак, тој имаше долг разговор со британскиот контроверзен новинар Пирс Морган.

А во интервјуто, каде што кажа дека не смета дека Лео Меси е подобар фудбалер од него, Роналдо првпат прозборе и за смртта на својот соиграч од репрезентацијата, Диого Жота, кој загина во страшна сообраќајка само две недели по свадбата.

Тој, на некој начин ги потврди гласините дека не се појавил на погребот за да не се сврти целото внимание кон него, наместо на загинатиот фудбалер и неговиот брат.

„Луѓето многу ме критикуваа, но не ми е гајле, затоа што не мислам дека треба да се грижам за тоа што мислат другите.

Прво, по погребот на татко ми никогаш не сум стапнал на гробишта. Второ, ја знаеш мојата репутација, каде и да се појавам станува циркус.

Не отидов и затоа што ако отидам некаде, вниманието се врти кон мене, а не сакам таков вид на внимание.

Може да ме критикуваат, но се чувствувам добро во однос на мојата одлука“, рекол Кристијано.

Тој раскажал и дека во моментот кога дознал за несреќата, бил на семеен одмор.

„Бевме сами со Џио, беше утро и наш момент да се опуштиме во теретана. Не можев да поверувам кога ми ја пратија пораката.

Плачев многу, Џио може да го потврди тоа. Смртта на Диого беше тежок момент за земјата, за неговото семејство, пријателите, соиграчите“, додал Роналдо.

За потсетување, репрезентативецот на Португалија и неговиот брат загинаа на автопат во Шпанија, кога со автомобилот удриле во банкина и возилото се запалило. Тие биле на пат кон Англија, каде што живееја, а Диого играше за „Манчестер Јунајтед“.

Несреќата се случи неполни две недели откако фудбалерот се венча со својата љубов од детството, со која доби три деца.

Погледнете го видеото:

А. Ј. | Црнобело