Горди сме! Јана Атанасовска оствари најдобар резултат во македонското женско алпско скијање, пред Олимпијадата 2026

Детали

четврток, 29 јануари 2026

Македонската скијачка Јана Атанасовска го освои 4 место во слалом на првата ФИС трката што се одржа во Телфс, Австрија, а 6 место во втората и со тоа испиша нова историја во оваа скијачка дисциплина во Македонија.

Нашата скијачка Јана Атанасовска се подготвува за Олимпијадата што ќе почне на 6 февруари во Милано и успеа да испише историја во македонското женско скијање.

Со 4 место во првата трка, а 6-то во втората, Јана постигна најдобар македонски женски резултат во алпско скијање, но и свој личен успех.

Со успехот на младата скијачка се гордеат и од Скијачката федерација на Македонија, кои на социјалните мрежи објавија неколку фотки.

„Во првата трка Јана го освои 4-то место и ги подобри своите ФИС поени на 26.41, што претставува нејзин најдобар личен резултат, а воедно и најдобар македонски женски резултат во слалом.

Во втората слаломска трка истиот ден, Јана го освои 6-то место со 30.78 ФИС поени, потврдувајќи ја својата стабилна форма и континуиран напредок во силна меѓународна конкуренција.

Овој настап доаѓа како дел од нејзините подготовки и настапи пред претстојниот олимписки циклус и Олимписките игри во Милано, што дополнително ја нагласува важноста на постигнатите резултати.

Искрени честитки до Јана и нејзиниот тренер Александар Атанасовски – Чаве!“ - напишаа од Федерацијата.

А. Ј. | Црнобело