Доказ дека доброто со добро се враќа: Бездомник спаси бебе од сигурна смрт, истиот ден го вработија (видео)

Детали

петок, 12 мај 2023

Вирално се шири видео од бездомник, кој додека бил на интервју за работа, истрчал на улица за да спаси бебе чија количка забрзано се движела кон улица полна со сообраќај – бебето е спасено, а тој како херој веднаш ја доби работата.

На социјалните мрежи деновиве кружеше застрашувачко видео од мигот кога на жена од Калифорнија ѝ се испушта количката со бебето и почнува да се движи кон улицата полна со сообраќај.

Жената се обидува да ја фати количката, но се лизнува и паѓа... Повторно се обидува да стане, но не може и само гледа што ќе се случи...

И, во мигот кога мислите дека, за жал, на бебето му нема спас, се гледа како непознат човек доаѓа и успева да ја задржи количката пред да се случи вистинска трагедија.

Херојот што го спаси бебето е Рон Несман, бездомник кој во моментот седел на клупа во близина и гледал како жената, која му е тетка на девојчето, излегувала од автомобилот. Но ветерот почнал да ја турка количката кон улицата.

„Ја видов жената и ми беше жал за неа. Имам внуци и внуки и не можам да замислам да им се случи такво нешто“ – изјави тој за медиумите.

Инаку, Рон е поранешен камионџија чијшто живот целосно се распаднал по смртта на неговата девојка во 2018-та година.

Тој долго време бил бездомник, и неодамна се вратил да живее во областа каде што ги видел жената и бебето.

Раскажа дека дента кога се случил инцидентот, само што завршил со интервју за работа во ресторан во близина и седел на клупата за да се одмори.

Откако видеото со неговото добро дело стана вирално на социјалните мрежи, Рон даде уште една изјава во која рече дека ја добил работата во ресторанот за која бил на интервју. Тој ќе почне да мие садови во ресторанот, и е благодарен што има работа.

„Морам да дојдам утре на работа, не можам да дочекам да почнам. Знаете што мислам? Конечно ќе се чувствувам добро“.

Тој вели дека иако голем број луѓе се обиделе да соберат средства за да му помогнат, сепак е одлучен сам да ги заработи сопствените пари и не бара милостина.

Б. С. Б. | Црнобело