Жена ја оставила ќерка ѝ (5) сама во хотел на Мајорка за да се забавува: „Пиеше од утро до мрак, туристите се грижеа за девојчето“

Детали

вторник, 04 јули 2023

Негрижата на мајка од Ирска ја разбранува јавноста – 45-годишната жена била на одмор на Мајорка со ќерка ѝ (5), кога ја оставила потполно сама за да пие алкохол. Другите гости во хотелот се грижеле за девојчето и го хранеле, пред да повикаат полиција и мајката да биде уапсена.

Жена од Ирска која била на одмор на Мајорка ја оставила 5-годишната ќерка сама во хотел, само за да може да пие алкохол.

Според британскиот Mirror, пред жената да биде лоцирана и уапсена, туристите од хотелот се грижеле за ќерка ѝ.

Додека другите воделе грижа за нејзиното дете, мајката или пиела во барот во хотелот или била заспана на креветите за сончање и воопшто не обрнувала внимание на девојчето.

45-годишната мајка се забавувала „од утро до мрак“ и кога во хотелот одбивале да ѝ служат алкохол, таа одела во маркет во близина за да си купи и да продолжи со забавата.

Наводно сега девојчето е со татко ѝ, кој веднаш дошол од Ирска штом слушнал за негрижата на мајката.

„Уапсивме 45-годишна жена од Ирска која беше на одмор на Мајорка, за напуштање дете. Таа го оставила детето само за да може да пие алкохол. Почнала да пие уште од првиот ден кога стигнала во хотелот.

Пиела огромни количини алкохол од моментот кога станувала, до моментот кога си легнувала. За малото девојче се грижеле други туристи кои отседнувале во истиот хотел. Туристите ја хранеле, ѝ ставале крем со заштитен фактор и внимавале на неа.

Вработените во хотелот престанале да ѝ даваат алкохол на мајката, но таа одела во супермаркет во близина за да си купи пиво“, гласи изјавата од шпанската полиција.

Жената била уапсена минатиот вторник (27.06), откако туристите во хотелот решиле дека е време да ја известат полицијата.

„Жената беше уапсена откако беше лоцирана во нејзината соба и конечно ја отвори вратата во видно алкохолизирана состојба. Девојчето беше згрижено додека не дојде нејзиниот татко од Ирска“.

Во коментари на објави за случајот, мајката е остро критикувана:

„Сирото девојче. Каков одмор ѝ приредила мајка ѝ…“

„Мајка на годината“.

„Ужасна мајка“.

Спирова С. | Црнобело