Тон позитива: Ресторан во Јапонија вработува само луѓе со деменција - секоја нарачка е погрешна, а гостите не се бунат

Детали

вторник, 22 август 2023

Во Токио постои ресторан кој вработува само луѓе со деменција. Тука ќе порачате суши, а ќе добиете кафе со цевка. Или ќе ви донесат нудли наместо кнедли. Но, гостите се задоволни, бидејќи знаат дека ги очекува изненадување. Симпатично, зарем не?

Популарниот „Ресторан на погрешни порачки“ во Токио е познат по тоа што гостите најчесто добиваат работи што не ги порачале.

Но, тие не се бунат, бидејќи знаат дека постои голема веројатност да добијат нешто сосема трето од она што го порачале.

Причината за ова е што сите келнери кои работат во ресторанот имаат деменција.

Деменција е општ термин кој опишува состојба во која се губи меморијата, се намалува можноста за учење и комуникациски вештини.

Една од тие болести е Алцхајмеровата болест.

Овој ресторан го отворил телевизискиот режисер Широ Огуни за да ја смени перцепцијата за стареењето и прогресивното когнитивно оштетување на мозокот.

Идејата ја добил при посета на старечки дом, кога му донеле кнедли наместо хамбургер.

Прво сакал да ја врати порачката, но тогаш сфатил дека луѓето со деменција живеат во поинаков свет, а дека грешката во порачката на никаков начин не му штети нему, или на кој било што добил погрешна порачка во ресторанот во старечкиот дом.

Откако Огуни го отворил ресторанот, инспирирал и други претприемачи да отворат ваков тип на ресторани во Австралија и Јужна Кореја.

Гостите однапред знаат дека што и да порачаат, најверојатно нема да го добијат очекуваното, па затоа не се бунат.

Притоа, гостите околу себе гледаат весели, насмеани лица, кои и покрај деменцијата се комуникативни и разговорливи, па уживаат во времето поминато таму.

Според Forbes, првото истражување меѓу муштериите покажало дека 37% од порачките биле згрешени, до 99% од нив рекле дека биле задоволни со својот оброк.

„Целта на овој ресторан е да нè поттикне да ги прифатиме и разбереме луѓето кои имаат деменција, да бидеме добри едни со други, без оглед на нашите проблеми и мани“, рекол Огуни.

А. Ј. | Црнобело