Гратче во Исланд може да биде уништено од вулкан, по 1.000 земјотреси во 2 дена (фото+видео)

Детали

понеделник, 13 ноември 2023

Гратчето Гриндавик кое се наоѓа во близина на Рејкјавик викендов беше евакуирано поради опасност да биде уништено од вулканска ерупција. Изминативе неколку дена, во областа биле забележани околу 1.000 земјотреси кои го „активирале“ вулканскиот систем во близина на градот. На Твитер веќе се споделуваат морничави видеа од земјотресот, но и движењето на земјата поради вулканската активност.

Поради бројни мали земјотреси во Исланд, властите и жителите се загрижени поради опасност од вулканска ерупција.

Гратчето Гриндавик во југозападниот дел на државата е изложено на најголем ризик и веќе е евакуирано.

Во градот, кој се наоѓа на околу 40 километри од Рејкјавик, има околу 3.400 жители кои беа присилени да ги напуштат нивните домови.

Според The Guardian, во неделата (12.11) на дел од жителите им било дозволено да се вратат во своите домови на само неколку минути за да ги земат работите што им се неопходни.

Потресите биле забележани во саботата, имале јачина од четири-пет степени според Рихтер и биле речиси постојани.

Според метеоролозите и експертите од Исланд, биле регистрирани околу 1.000 помали земјотреси, кои значително го зголемиле ризикот од ерупции. Притоа, предизвикале и материјална штета.

На само околу 800 метри под евакуираното гратче бил забележан тунел од магма кој ги натерал властите да реагираат.

Во близина на гратчето се наоѓа вулканот и Fagradalsfjall, а околу него имало чести потреси изминативе неколку недели.

Претходно, цели осум векови вулканите во областа биле „заспани“.

Во Исланд има околу 130 вулкани, од кои 32 се активни.

На Твитер веќе се споделуваат видеа и фотки од земјотресот и распуканиот асфалт на улиците:

Спирова С. | Црнобело