„Имам над 50 алергии на храна – соучениците во средно ми подметнуваа јатки за да видат што ќе ми се случи“

Детали

четврток, 28 декември 2023

„Првиот пат кога паднав во анафилактичен шок чувствував како грлото ми се затвора, поцрвенев, не можев ниту да зборувам ни да дишам“ – млада девојка од САД има над 50 различни видови алергии на храна, а раскажува како заради состојбата, животот во детството ѝ бил кошмар.

Миа Силверман (20) од Бостон, САД е алергична на 50 различни видови храна. Исхраната на младата Американка не смее да вклучува јаткасти плодови и млечни производи, но и одредени прехранбени бои, зачини или природни вкусови.

Денес таа редовно објавува видеа на ТикТок и се обидува да ја поткрене свеста и да им помогне на сите оние што имаат проблеми со алергиите, а вели дека животот воопшто не ѝ бил лесен.

„Во средно училиште бев жртва на булинг.

Децата се шегуваа и знаеја да ми подметнат јаткасти плодови во храната за да видат што ќе се случи, а во основно училиште имаше посебна маса каде што не се служеа јаткасти плодови и беше тажно што таму секогаш седев сама.

Кога и да бев поканета на некои забави и дружења, секогаш се чувствував како отпадник затоа што морав да си носам безбедна храна со мене“ – вели таа.

Миа признава дека дури кога започнала да оди на колеџ успеала да најде вистински пријатели коишто се труделе да ѝ помогнат и се адаптирале на нејзините потреби.

Миа раскажува дека мајка ѝ и татко ѝ се труделе максимално да се приспособат на исхраната на Миа, но тоа не може да се каже за другите роднини, па сите семејни забави за неа се вистински кошмар.

„Секогаш одам, но морам да си однесам сопствена храна. Се чувствувам како отпадник, иако сум таму и сум поканета, тешко ми е кога гледам како сите јадат од храната што е послужена, но јас не смеам да пробам ништо“ – вели таа.

Првата алергиски реакции Миа ги имала уште како бебе, заради што имала грчеви и болки во стомакот.

„Еден ден татко ми си дојде од работа и донесе колачиња со јаткасти плодови и јас веднаш изедов едно, по што веднаш паднав во анафилактичен шок и тоа беше првпат да почувствувам нешто такво.

Грлото почна да ми се затвора, поцрвенев, не можев ниту да зборувам, не можев да дишам, почнав да повраќам. Навистина беше страшно“ – раскажува Миа и вели дека по ова, нејзините родители веднаш викнале брза помош и ја пренеле во болница.

Миа со текот на годините успеала да ги надмине алергиите на соја, кокос и глутен, но уште е алергична на над 50 различни видови храна.

Таа денес не може да јаде: јаткасти плодови, семки и масла од семки, риби и школки, праски, киви, круши, цреши, манго, јаболка, лубеница, модар домат, тиквички, наут, леќа, неварени млечни производи, јајца, чоколадо, кафе...

Б. С. Б. | Црнобело