„Освоив 172 милиони евра на лото - Како добивката ми го уништи животот?“

Детали

четврток, 18 јануари 2024

Родителите престанале да разговараат со неа затоа што сметале дека не им дала доволно пари, сопругот ја напуштил затоа што не можел да го поднесе стресот. „Парите требаше да ни донесат среќа, но луѓето се алчни“ – тврди жената која освои 172 милиони евра на лото.

Џилијан Бејфорд од Шкотска и нејзиниот тогашен сопруг Едриен биле добитници на околу 172 милиони евра на Евролотаријата во 2012-та година, но наместо да им ги решат сите проблеми, парите само им предизвикале поголеми несреќи во животот.

Џилијан сега ја раскажува својата приказна со цел да им укаже на луѓето дека парите не се решение за сите проблеми и дека големата сума што ја стекнала преку ноќ само ѝ донела поголеми несреќи и проблеми.

Првиот проблем настанал кога Џилијан се разделила од сопругот Едриен заради стресот што тие го трпеле како пар по огромната животна пресвртница.

По ова, целосно бил нарушен односот со нејзините родители.

Таа тврди дека на родителите им дала солидна сума од околу 20 милиони евра, но тоа не било доволно. Таа појаснува дека дала околу 815.000 евра за да ги отплати долговите на татко ѝ и финансирала неколку пропаднати бизниси на нејзиниот брат.

Им купила пентхаус на родителите во источна Шкотска за да не живеат во сиромаштија и му позајмувала пари на братот за да започне бизниси, но очигледно тоа не било доволно.

Брат ѝ денес има куќа вредна стотици илјади евра и вози луксузни автомобили, но не сака ниту да ѝ се јави на сестрата што му помогнала, па дури не сакал ниту да ја покани на свадба.

Од друга страна, татко ѝ на Џилијан во еден миг се обидел по судски пат да ѝ ги одземе парите, па дури и да земе и дел од нејзиниот приватен бизнис.

„Навистина е вознемирувачки и сурово. Парите требаше да нè направат среќни, но луѓето само бараат нешто и станаа алчни.

Заради нив никој не ме почитува во селото, па дури добивам закани и дека ќе ми го запалат домот“ – вели таа во една изјава.

Мајка ѝ, пак, тврди дека Џилијан самата е виновна заради нивните нарушени односи и дека иако им дала солидна сума на пари, сепак не биле 20 милиони евра.

Б. С. Б. | Црнобело