Докторот што ја оперирал Британката која почина во Белград: „Јас не сум виновен“

Детали

четврток, 25 јануари 2024

„Девојката не почина од компликации по операцијата за намалување на желудникот“ – тврди турскиот хирург Серкан Бајил кој ја оперираше Британката Морган Рибеиро, заради која авион принудно слета во Белград, а, за жал, почина по 4-дневна кома.

Откако во сите светски медиуми беше пренесена веста за трагичната смрт на 20-годишната Морган Рибеиро, која била на операција за намалување на желудникот во Турција, а на враќање почина во Србија, се огласи и хирургот што ја извел операцијата.

Докторот Серкан Бајил појасни дека на 5-ти јануари годинава извел операција со која на желудникот на Морган бил ставен прстен.

Младата Британка зела околу 2.000 фунти од заштедата што нејзините родители ја чувале за неа, и сама си ја платила операцијата, за да избегне долгогодишно чекање во британскиот здравствен систем.

Но, на пат кон дома, состојбата ѝ се влошила и авионот принудно слетал во Белград, па била пренесена во болница во Србија.

Докторот што ја извел операцијата во Турција сега тврди дека тој не направил грешка и дека нејзината смрт е предизвикана од емболизам или пулмонарна емболија.

Емболизмот се јавува кога тромб, односно згрутчена крв ќе се откине од екстремитетите на телото и ќе навлезе во пулмоналните артерии. Се смета дека патувањето и долгото мирување можат да го зголемат ризикот од оваа појава.

„Таа почина затоа што претрпела емболизам за време на летот, а не заради компликации по операцијата. Навистина сум потресен, беше толку млада, посакувам тоа никогаш да не се случеше.

Ова ми се случува првпат во кариерата“ – тврди хирургот кој зад себе има 20-годишно искуство во професијата.

Мајката на Морган, пак, тврди дека според наодите на српските лекари, хирургот не го забележал малиот засек на тенкото црево од каде потоа почнала да протекува храна во крвниот систем и предизвикала септички шок.

Таа преживеала срцев удар, по што лекарите ја ставиле во индуцирана кома, но за жал по 4 дена девојката починала.

Инаку, Морган одлучила да оди во Турција и да направи операција по поволна цена, откако претходно трпела врсничко насилство и навреди заради прекумерната тежина.

Нејзиниот дечко, Џејмс Брестер, тврди дека медицинските лица не ја информирале Морган за опасностите што со себе ги носи хируршкиот зафат.

Прочитајте и Мајка ѝ не знаела дека ќе го намалува желудникот: Детали за смртта на Британката заради која авион принудно слета во Белград

Б. С. Б. | Црнобело