„Ѝ се восхитувам - се бореше со ракот и молчеше додека сите ја напаѓаа“ – Шенон Доерти ја возвишува принцезата Кејт

Детали

понеделник, 25 март 2024

„Да се биде јавна личност не значи дека си сопственост на јавноста. Сите ние имаме право приватно да се избориме со болеста“ – актерката Шенон Доерти која со години се бори со ракот застана во одбрана на принцезата од Велс. Што е познато за состојбата на Кејт и што се случува во најблискиот круг на семејството?

Принцот и принцезата од Велс, Вилијам и Кејт, преку својот портпарол за првпат јавно се огласија по соопштувањето на дијагнозата на Кејт во видеото што го обиколи светот.

„Принцот и принцезата се заблагодаруваат од љубезните пораки што ги добија од Обединетото Кралство, од другите земји на Комонвелтот, но и од целиот свет.

Тие се екстремно благодарни за топлината од јавноста и поддршката и благодарни се за разбирањето за потребата од приватност во овој период“ – стои во соопштението од Кенсингтонската палата во TIME.

Кејт во своето обраќање соопшти дека со Вилијам долго време молчеле за нејзината дијагноза со цел да ги заштитат своите деца и да им ја објаснат ситуацијата пред веста да биде изнесена во јавноста.

По видео пораката на Кејт, во светските медиуми не стивнуваат пишувањата поврзани со нејзиното соопштение и со самата дијагноза.

Така, познато е дека сопругот на Кејт, принцот Вилијам дознал за болеста на сопругата на 27-ми февруари, односно еден месец по нејзината операција на абдоменот, па заради тоа го откажал присуството на меморијалната служба посветена на неговиот кум, кралот Константин од Грција.

Еден ден пред да ја соопшти дијагнозата во јавноста, Кејт имала приватен ручек со нејзиниот свекор, кралот Чарлс и тие двајца зборувале за сличните здравствени проблеми низ кои минуваат истовремено, а според Times UK, Хари и Меган не биле вклучени во потесното семејство, па вестите ги дознале преку телевизија, како и сите останати.

Видео пораката што Кејт ја сними во градината во замокот Виндзор, беше шлаканица за сите оние што со месеци наназад креираа теории на заговор и се потсмеваа на нејзина сметка, а според извори блиски до принцезата таа сама го напишала говорот и чекала кога ќе биде вистинскиот миг за да ги соопшти вестите во јавноста.

Актерката Шенон Доерти, која со години се бори со ракот, упати јавна порака до сите оние што коваа теории на заговор во изминатите месеци и ѝ даде јавна поддршка на принцезата.

„Да се биде јавна личност не значи дека си сопственост на јавноста. Сите ние имаме право приватно да се избориме со болеста.

Напливот на теории на заговор, обидот за право на сопственост и морбидната љубопитност ја натераа оваа личност да се објаснува пред сама да се соочи и да им објасни на сопствените деца (што ѝ се случува).

Се молам ова да ни биде поука на сите да ја почитуваме туѓата приватност, без разлика дали се работи за јавни личност. И до принцезата Кејт - Ти се восхитувам на силата што ја имаше да ги издржиш бескрајните напади додека се бореше со ракот“ – порача Шенон.

Инаку, со оглед на тоа што Кејт не соопшти за каков тип на рак се работи, во дел од медиумите се пренесуваат изјави на лекари, онколози, кои нагаѓаат од што би можела да боледува принцезата.

Докторот Марк Сигел за Fox News вели дека можеби станува збор за рак на дебелото црево или за гинеколошки рак и според него најверојатно е состојба што може да се излекува.

Но, лекарот за крај нагласи:

„Мора да ја почитуваме нејзината приватност и да покажеме сочувство и емпатија, особено заради тоа што станува збор за млада личност која има мали деца“.

За потсетување, Кејт Мидлтон, во петокот (22.02) преку видео порака соопшти дека ѝ бил дијагностициран рак и дека по препорака на лекарите морала да прима хемотерапија.

Б. С. Б. | Црнобело