Дневна доза инспирација: Девојка со вроден тумор на лицето не се плаши да биде убава

Детали

петок, 19 август 2016

Маримар Кироа е 21-годишна девојка од Калифорнија која е родена со тумор на лицето, односно цистичен хигром.

Поради нејзината состојба таа не може да зборува, дишењето ѝ е отежнато, храната ѝ поминува низ цевка во стомакот, а слухот на нејзиното десно уво е намален.

Но, и покрај овие проблеми, Маримар не се откажува од своите соништа.

„Мојата состојба не ме запира на никаков начин – не постои нешто што не можам да го направам“, вели храбрата Маримар.

По многубројните операции со цел намалување на туморот на лицето, Маримар конечно се прифатила себеси онаква каква што е, и е подготвена да го сподели тоа со светот.

„Се охрабрував себеси и ги набројував сите добри карактеристики што ги поседувам, па во текот на годините си ја зголемив самодовербата.

Она што ми се допаѓа кај шминката е можноста да се креира нов лик, особено во делот на очите и што можам да им покажам на луѓето дека се убави без оглед на сè“.

Луѓето оставаат многубројни коментари под нејзините видеа со совети за шминкање.

Некои се позитивни и охрабрувачки, а некои се прилично злобни и негативни.

Голем дел од луѓето ѝ пишуваат дека изгледа како мајмун, нејзината уста е на погрешно место или едноставно непристојно зјапаат во неа во јавност.

„Кога луѓето ми кажуваат негативни работи им велам да престанат или едноставно ги игнорирам. Ако некој зјапа во мене, му возвраќам на истиот начин и одбивам да го тргнам погледот од нив додека тие не го сторат тоа“, вели Маримар.

Маримар комуницира со помош на знаковниот јазик на глувонемите во нејзините видеа, поместувајќи ги традиционалните стандарди за убавина.

Нејзината моќна порака нè потсетува дека треба да се сакаме себеси.

„Не е важно како изгледате или како се чувствувате во врска со обликот на своето тело. Прифатете се себеси, тоа е она што е важно“, ја завршува Маримар својата порака.

 

• 
• 
• 
• 
• 
• 
• 
• 
• 
• 
• 
• 
•  

(О)Милена | Црнобело