Финска - држава која некогаш се гушеше во сиромаштија, а денес е пример за успешност

Детали

понеделник, 19 февруари 2018

Пред повеќе од еден век, во Финска луѓето умирале од глад и сиромаштија, но и покрај неславното минато, денес е пример за успешно водење на држава и спроведување на ефикасен потрошувачки и образовен систем.

Пред 150 години, во Финска изумреле 250.000 луѓе како последица на глад, односно 10% од тогашната вкупна популација.

Денес, според сите меѓународни индекси, оваа држава е стабилна и безбедна, со функционален политички систем, една од најбогатите, но и најмалку корумпираните земји, а во исто време и најправедна, кога е во прашање општествениот статус на жителите.

Правосудството во Финска е едно од најнезависните, полицијата најдоверлива, компаниите со високо ниво на етика, а изборите втори најслободни во светот. Граѓаните уживаат големи лични слободи и општи добра.

Каде лежи тајната на финскиот успех?

Секако дека не постои општа тајна со која секоја држава би ги решила внатрешните проблеми, а во Финска тоа е одличен сплет на околности, историја и менталитет.

Политичарката Тарја Халонен успехот го припишува на географската положба и климатските фактори, поради што луѓето треба напорно да работат за да заработат за себе и семејствата.

Поранешниот американски амбасадор во Хелсинки, Брус Орек, останал да живее таму и по мандатот бидејќи му се допаднало како Финците се држат до својата приватност, но истовремено се отворени за соработка и за помош на пријателите.

Сите колективно работат за специфична цел, сè се сведува на соработка. Еднаквоста е еден од приоритетите на жителите и тука можеби лежи тајната на колективниот успех, што придонесе денес Финска да е една од земјите кои се пример за политичка и економска еднаквост на сите жители.

Дури ни оние кои се поимотни никогаш не се двојат, а луѓето можеби секој ден се разминуваат со некој богат, без да го забележат тоа. 

Исто така, образовниот систем е еден од клучевите за напредок на државата и социјалната конструкција. Целиот придонес во социјалниот развој го дале академици и универзитетски професори, вклучувајќи ги тука и јазикот и традиционалната музика.

Важна „состојка“ во успехот на Финска е и меѓусебната доверба – меѓу жителите е забележано високо ниво на доверба, што не е случај во голем број други држави.

Според неодамна одржаниот Светски економски форум, Финска е земја со најмногу иновации по жител.

Така, може да се заклучи дека всушност не постои тајна или магија, туку дека сè зависи од факторите како што се соработка, еднаквост, доверба и образование, кои освен во Финска, се присутни и во другите скандинавски земји, наведува Guardian.

С. У. | Црнобело