2 месеци после пожарот: До каде е реновирањето на Нотр Дам во Париз?

Детали

четврток, 27 јуни 2019

Поминаа повеќе од два месеци од пожарот во најпознатата црква во Париз, а сè уште не е јасно во која насока ќе се движи реновирањето.

Патрик Шове, деканот на катедралата, изјавил дека Богородичната црква е навистина жива. Но, изјавата на Барбара Шок-Вернер, која претходно водела работилница за обнова и одржување на Келнската катедрала, звучи малку поразлично.

Имено, според неа, црквата која сега е затворена за јавноста уште е изложена на опасност од рушење.

Расчистувањето го забавува почетокот на реконструкцијата

Барбара изјавила дека потпорните греди кои биле потопени за време на гасењето на пожарот можат да фатат мувла.

Таа изјавила дека состојбата на црквата била подобра вториот пат кога ја посетила, но дека изгорените греди и делови од срушениот покрив сè уште се наоѓаат на подот на црквата.

Францускиот претседател Емануел Макрон во обраќањето веднаш после пожарот вети дека црквата ќе биде обновена за пет години.

Филипе Виленув, главниот архитект за обновување на катедралата, се има тргнато настрана од тој временски рок.

Најголем проблем при реновирањето претставуваат тоните растопено олово од покривот кое ја труе внатрешноста на црквата. Поради опасност од труење, при отстранување на отпадот употребувале мали багери.

Ова го забавува чистењето, без кое реконструкцијата воопшто не може да почне.

Владата го има последниот збор

Макрон побара „креативно реновирање“, поврзаност на традицијата и модерното и „храброст полна со почит“. Овие слогани го поттикнаа натпреварувачкиот дух на архитектонскиот конкурс што беше распишан од владата.

До крајот на јуни, најверојатно ќе бидат доставени и предлози за обликување на кровот. Во меѓувреме се знае за неколку предлози – архитектот Винсент Калебо предлага на кровот на обновената црква да се изгради градина, на која годишно би се одгледувале околу 20 тони овошје и зеленчук.

Архитектот Улфа Мејергрен предлага да се изгради базен на кровот, така што црквената кула би била како водоскок.

Министерот за култура ги повикал Французите да учествуваат во јавната дебата за идниот изглед на катедралата, но сепак нагласил дека последниот збор ќе го има државата. Притоа не е јасно кога ќе се донесе одлука.

Една анкета од минатиот месец откри дека 54% од Французите поддржуваат реконструкција со стариот изглед на катедрала.

Без големи очекувања

Уште не е разјаснето како ќе се финансира реновирањето. После пожарот беа најавени многу големи донации, но до 14-ти јуни биле уплатени само 85 од ветените 850 милиони евра.

Голем револт предизвика фактот што поголемиот дел од донациите се од државјани на САД, додека Французите не платиле ни цент од ветеното. После овие критики почнале да пристигаат и француски донации, но сепак со мал износ.

Барбара предупредува дека не треба да имаме преголеми очекувања. Според неа, дури и ако кровот се постави за 5 години, на црквата ќе има уште многу работа.

Спирова С. | Црнобело