„Сакаме финансиска независност“ - Принцот Хари и Меган се повлекуваат од кралска должност

Детали

четврток, 09 јануари 2020

Вчеравечер, Хари и Меган предизвикаа вистинска бура кога изјавија дека планираат да се повлечат од нивните кралски должности.

Одлуката била донесена без знаење на кралицата, принцот Чарлс или принцот Вилијамс, кои наводно првпат ја слушнале веста на телевизија.

Хари и Меган само што се вратија од 6-неделниот одмор во Канада и наводно, ќе го минуваат нивното време наизменично во Британија и Северна Америка.

Според изворите, останатите членови на кралското семејство биле длабоко разочарани, шокирани, но и гневни на познатиот пар.

„Разговорите со војводата и војвотката од Сасекс се во почетна фаза. Ја разбираме нивната желба да пробаат нешто друго, но ова се комплицирани проблеми за кои е потребно време“, изјавија од Бакингемската палата.

Неколку извори тврдат дека парот тајно ја донел одлуката за време на престојот во Канада, а постојат и гласини дека ќе креираат нов веб-сајт, независен од кралското семејство.

„После многу месеци размислување и разговор, одлучивме да направиме промена оваа година. Сакаме да се повлечеме од позицијата ’постари‘ членови на кралското семејство и да работиме за да станеме финансиски независни, притоа поддржувајќи ја кралицата.

Планираме да го минуваме времето во Велика Британија и Северна Америка. Оваа географска рамнотежа ќе ни овозможи да го израснеме нашиот син со почит кон кралската традиција во којашто се роди, но сепак ќе му дадеме простор на нашето семејство да се фокусира на следното поглавје. Ќе ги споделиме деталите за овој возбудлив нов чекор и ќе продолжиме да соработуваме со Нејзиното височество кралицата, принцот од Велс и војводата од Кембриџ.

Дотогаш, прифатете ја нашата благодарност за вашата постојана поддршка.“ - стои во изјавата на Хари и Меган.

Парот сè уште не знае каде би живеел во Северна Америка, но и Канада е една од опциите.

Хари и Меган сакаат финансиска независност, но наводно, не знаеле како ќе го направат тоа. Засега ќе продолжат да земаат пари од кралицата и принцот од Велс за да ги финансираат нивните официјални обврски.

Парот нема да се откажe од кралските титули или статус и инсистираат да го зачуваат Frogmore Cottage, домот од 2,4 милиони фунти.

„Семејството сака да им помогне, но ова е разговор што требаше да се направи дискретно и тивко. Не знаат каде ќе живеат и не знаат како ќе заработуваат“, вели еден извор.

Претходно, Хари изјави дека се плаши дека Меган ќе стане жртва како мајка му. Факт е дека парот беше мета на голем број медиумски притисоци и постојано беа критикувани за нивните животни одлуки.

Најверојатно, притисокот бил преголем, па парот одлучил дека повлекувањето од кралските должности е најдоброто решение.

Спирова С. | Црнобело