Модерните „Ромео и Јулија“ кои се вљубија гледајќи се од тераса, сега ќе се венчаат

Детали

вторник, 22 септември 2020

Се сеќавате ли на парот од Италија кој се заљуби преку прозор за време на карантинот? Од испишано име на зграда и допишување на Инстаграм до брак после карантинот – приказната за модерните „Ромео и Јулија“.

За време на строгиот карантин, Италијанците речиси секој ден излегуваа на прозорци и тераси за да пеат и свират на инструменти, со што си помагаа да го поткренат духот во тешките времиња.

Така, Мишел и Паола кои живеат во две спротивни згради, се вљубија на прв поглед преку тераса, а кога тој го дознал нејзиното име, го испишал на чаршаф на неговата зграда.

Приказната за модерните „Ромео и Јулија“ го обиколи светот – прочитајте повеќе за нивното заљубување ТУКА.

За време на карантинот, парот се запознаваше преку пораки, а сега, неколку месеци подоцна, тие соопштија дека ќе се венчаат.

„Со сигурност ќе се венчаме, а ни остана уште да одбереме датум. Размислуваме за церемонија на големата тераса на кровот од мојата зграда, што ќе има смисла бидејќи се запознавме на нашите балкони.“ – открива 40-годишната Паола.

Додека траеше карантинот парот се допишуваше на Инстаграм и разговараше на телефон, а за првпат се сретнаа дури во мај, во локалниот парк во Верона.

Уште по првата средба сфатиле дека се такви какви што се замислувале и се доживеале како сродни души, а брзо потоа испланирале да се вселат заедно.

М. М. | Црнобело