Девојка со Даунов синдром ја одбиле на 15 работни места, па си отворила бизнис со колачиња

Детали

четврток, 10 декември 2020

Одлучила тоа во што ужива (печењето колачиња) да ѝ стане бизнис... Сега има успешна фирма со 15 вработени и продала повеќе од 1 милион колачиња.

Колет Дивито од Бостон е девојка со Даунов синдром која на сите интервјуа за работа добивала одговор дека не е соодветен кандитат.

По 15-тото одбивање при аплицирање за работа на Колет ѝ здодеало, па одлучила да си отвори свој бизнис со колачиња.

30-годишната девојка направила храбар потег, кој се покажал како вистинска одлука.

„Имав интервјуа за работа за кои мислев дека поминале добро, но по неколку дена добивав мејлови во кои ми велеа дека нешто не било во ред или дека не одговарам за работното место. Тоа беше фрустрирачко за мене, бев вознемирена, затоа што се случуваше одново и одново.

Но, наместо да седам дома и да се чувствувам лошо што не добивав можност да работам, јас одлучив тоа во кое што уживам (печењето колачиња) да го направам свој бизнис“, изјави Колет.

На почетокот таа почнала многу скромно, но имала успех и сега има 15 вработени.

Вели дека од лансирањето на бизнисот досега продала преку 1 милион колачиња.

Сега, повеќе е ангажирана околу менаџерските обврски, но уште сака одвреме навреме да учествува во печењето колачиња.

Колет е доказ дека соништата се остваруваат ако имате храброст да се осмелите.

С. С. | Црнобело