Беше најсиромашен принц кога се ожени со кралицата, а по смртта остави милиони – кој ќе го наследи богатството на Филип?

Детали

среда, 28 април 2021

Пред да се ожени за кралицата Елизабета, Филип бил осиромашен принц од растурено семејство, кој бил приморан да ѝ се приклучи на кралската морнарица, каде што практично и се запознава со љубовта на неговиот живот. Денес, се проценува дека зад себе принцот остави богатство вредно помеѓу 10 и 30 милиони британски фунти, односно околу 12 до 35 милиони евра.

По смртта на принцот Филип, се поставува прашањето: Кому ќе му припадне богатството што тој го остави зад себе?

Засега не се знае точниот износ на богатството што тој го остави по својата смрт, но добро познат факт е дека преку работењето во морнарицата, кралските должности и, секако, преку инвестиции, починатиот принц успеа да собере масовно богатство, како и поголем број вредни предмети. Исто така, тој поседуваше многу имоти, како и вредни колекционерски предмети, уметнички дела и ретки книги.

Како што пишуваат британските медиуми, голем дел од овие имоти се во заедничка сопственост со кралицата, така што таа останува нивни единствен сопственик. Сепак, некои вредни предмети веќе се дадени на други членови од кралското семејство.

Така, на пример, неговите пони коњи и темно зелената кочија ќе ѝ припаднат на 17-годишната леди Луиз, која е внука на Филип од неговиот најмал син - принцот Едвард.

Младата Луиз ја наследила љубовта на дедо ѝ за спортско возење кочии, а принцот го следеше и нејзиниот натпревар во 2019-тата година, кога таа го освои третото место.

Но, ова не е единственото нешто што семејството на принцот Едвард ќе го наследи.

Веќе се знае дека по смртта на кралицата, Едвард ќе ја наследи и титулата на неговиот татко - војводата од Единбург - заедно со сите привилегии што таа титула ги носи.

Сепак, поголемиот дел од богатството ќе оди во наследство на кралицата, а според традицијата на британското кралско семејство, по нејзината смрт, сѐ што поседува таа ќе биде наследено од оној што е следен во линијата, односно принцот Чарлс.

Б. С. Б. | Црнобело