Татко донирал бубрег за неговиот 4-годишен син да може да има нормален живот

Детали

вторник, 25 мај 2021

Родителите за децата секогаш се најважните личности, а овој татко стана вистински „супер-херој“ откако донираше бубрег за неговиот 4-годишен син. Приказната за овој татко и неговиот син е уште еден доказ дека родителската љубов не познава граници.

На малиот Оливер Кајтли од Велика Британија му било дијагностицирано хронично заболување на бубрезите кога бил бебе. Оливер првите четири години од животот ги поминал во болница на дијализа.

Сепак, таткото бил одлучен да му „подари“ на синот нормален живот. Откако дознал дека неговите бубрези се соодветни, таткото Џон во април отишол на операција.

Како и со сите други медицински случаи, така и Џон и Оливер се соочиле со одложување на процедурата поради светската пандемија, но сепак, минатиот месец по 4-часовна операција Оливер конечно го добил новиот бубрег. Тие двајцата сега се дома во Англија.

„Многу сум среќен што се согласив со трансплатацијата и на Оливер му подарив можност да живее. Тој смета дека јас сум вистински „супер-херој“. Навистина бев мошне вознемирен, но сè беше за мојот син“ – вели Џон.

Тој додава дека претходно било мошне тешко да му се објасни на Оливер дека нема можност да ги прави работите што сака да ги прави, главно затоа што, како и секое дете, многу сакал да си игра. Операцијата на родителите им дава надеж дека Оливер конечно ќе може да си игра послободно како и неговите врсници.

„Многу сум горда со нив двајцата. Оливер сонуваше да оди да плива или да скока на трамболина и сега конечно можеме да им кажеме збогум на дијализите секоја недела. Тоа беше неверојатен подарок.

Оливер е мошне темпераментно и мошне итро момче. Ги сака животните и диносаурусите и знае да именува голем дел од нив. Му купивме диносауруси кога почнаа да му ги тргаат цевчињата во болницата затоа што беше премногу храбар. Помина низ многу, но нè направи посилни како семејство и многу се радуваме што конечно сме дома“ - изјави мајката Кат Тејлор.

Инаку, Оливер ќе мора да прима лекови во текот на целиот живот, со цел неговото тело да не го отфрли трансплантираниот орган, но, нема да биде подложен на дијализа секоја недела.

Б. С. Б. | Црнобело