Исповед на мајка: „На 51 година го родив првото дете со ин-витро, никој не ме поддржа“

Детали

среда, 17 ноември 2021

„Се соочив со огромен отпор од моите родители затоа што одлучив да станам самохрана мајка на 50 години, но сега не знам што би правела без нивната поддршка“ – вели Кели Кларк од Англија која откако не го запознала вистинскиот одлучила да стане мајка со помош на донор.

Кели Кларк (51) од Англија отсекогаш сакала да има семејство, но никогаш не го запознала вистинскиот маж со кого би сакала да добие бебе, па одлучила да стане мајка сама.

Како што се приближувал нејзиниот 50-ти роденден, во април 2020-та година Кели одлучила да отпатува во Атина за да направи консултација за ин-витро оплодување, каде ѝ кажале дека ќе треба да користи семена течност од донор за да остане бремена.

Четири месеци подоцна таа повторно дошла во Атина за да ѝ го имплантираат оплодениот ембрион, а 12 дена подоцна со помош на тест дознала дека е бремена.

Кели за целиот процес потрошила околу 5.000 евра (за третманот, но и за патувањата), а вели дека овој процес во Обединетото Кралство би ја чинел тројно повеќе, па затоа се одлучила процедурата да ја заврши во Грција.

На 31-ви март Кели со царски рез ја добила ќерката Лајла Рае Кларк, која тежела 3kg и 400g.

Оваа самохрана мајка вели дека нејзината одлука не била примена со големо воодушевување од нејзините најблиски.

Нејзините родители очајно се обидувале да ја спречат да не направи ин витро оплодување, затоа што мислеле дека може да ја загуби работата, да претрпи финансиски проблеми и да си го влоши здравјето.

„Се соочив со огромен отпор од моето семејство затоа што одлучив да станам самохрана мајка на 50 години, затоа што тие беа загрижени за моето здравје и заради тоа што ќе користам донор. Беа против мојата одлука и навистина беше тешко, се чувствував како да ме отфрлаат.

Но, сега сфаќам дека тоа го правеа затоа што ме сакаат премногу. Се грижеа како ќе се справам со загубата доколку оплодувањето не биде успешно, затоа што знаеја колку многу сакам да бидам мајка – но, јас никогаш и не помислив дека можеби нема да успее, едноставно имав добро претчувство.

Сега кога Лајла е тука тие многу ме поддржуваат и се прекрасни баба и дедо. Не знам што би правела без нив“ – вели Кели.

Кели признава дека понекогаш е многу тешко да бидеш самохрана мајка, но дека не би ја променила сопствената одлука за ништо на светот.

„Нема да лажам и да ви кажам дека е лесно да си самохрана мајка, знаев дека нема да биде. Но, Лајла е ангел и мошне сум среќна. Таа е совршено бебе и е сè што сум посакувала да биде.

На сите што ме знаат им е јасно колку многу посакував да бидам мајка. Сè уште не ми се верува и многу сум среќна затоа што конечно станав мајка на 51 година“ – вели Кели.

Б. С. Б. | Црнобело