Вирално видео: 11-месечно девојче учи да борда иако уште не знае да оди

Детали

понеделник, 22 ноември 2021

Јуџи од Кина има само 11 месеци, но тоа не ја спречува да борда како мал професионалец, а виралното видео објавено од нејзините родители го докажува тоа.

Ванг Јуџи од Кина има 11 месеци и уште учи да оди, но може да борда како професионалец.

Видеото од малата Јуџи направено деновиве стана вирално и нема личност која не е изненадена од вештините на ова девојче.

Според нејзините родители, кои се љубители на спортови како скијање и велосипедизам, ова е првпат Јуџи да се качи на сноуборд.

Тие живеат во Пекинг, а откако посакале да пробаат сноубординг, решиле да ѝ дадат шанса и на нивната ќеркичка.

„Бидејќи наскоро во Кина ќе се одржат Зимските Олимписки игри, се охрабривме да им дадеме шанса на зимските спортови. Неодамна научивме да бордаме, а ја зедовме и нашата ќерка со цел и таа да проба нешто ново“.

„Филозофијата на нашето семејство е да ги охрабруваме децата да ги пробуваат спортовите што ги сакаме и ние. Кога отидовме со сопругот да учиме сноубординг, зедовме мал сноуборд и за ќерката.

Прво сакавме да ѝ го дадеме кога ќе биде малку поголема, но веднаш ѝ се допадна. Прво го проба дома – воопшто не ѝ беше страв и навистина уживаше“, вели мајката на Јуџи.

Потоа тие ја однеле малата Јуџи и во скијачки центар што го посетуваат скоро секоја зима, а таа веднаш покажала дека е експерт за сноубординг.

На видеото родителите го влечат сноубордот на Јуџи, a таа без проблем одржува рамнотежа.

„Уште не може сама да се спушти бидејќи сè уште ѝ е тешко да контролира во која насока ќе се движи сноубордот. Но понекогаш се охрабрува и сама. Во одлична форма е и воопшто не се плашеше првиот пат. Без проблем стоеше стабилно додека се движеше“.

Татко ѝ открива дека ова било и првпат Јуџи да види снег во нејзиниот живот.

„Многу е љубопитна за снегулките. Првпат виде снег оваа година – снегулките што исчезнуваат кога ќе паднат на нејзината рака се волшебни за неа“.

https://www.youtube.com/watch?v=g2SE8JtncoU

Спирова С. | Црнобело