Со авион одела на шопинг, а сега живее под кирија – Која е Александра Толстој, бившата сопруга на „банкарот на Путин“?
- Детали
- вторник, 30 ноември 2021
Од шопинг со приватен авион – до возење во метро во Лондон. Вака изгледа промената со којашто грофицата Александра Толстој се соочува откако одлучи да го напушти сопругот милијардер кој некогаш беше еден од најблиските соработници на Путин.
Животот на Александра Толстој помалку потсетува на животните приказни на некои од хероините во романите на нејзиниот далечен роднина Лав Николаевич Толстој. Од раскош и луксуз, до самохрана мајка во стан под кирија.
Грофицата Александра Толстој (47) е ќерка на грофот Николај Толстој и поранешна партнерка на рускиот милијардер Сергеј Пугачев (58), а на Инстаграм редовно споделува фотографии од нејзиниот нов живот.
Неодамна, грофицата која потекнува од аристократско семејство во Русија, објави фотографија од јавниот превоз во Лондон до која напиша:
„Еден ден навистина ќе научам да возам“.
Грофицата сега полека се привикнува на животот на „обична“ жена и мајка. Таа беше избркана од нејзиниот дом во Лондон откако нејзиниот поранешен сопруг, кој беше познат како „банкарот на Путин“, го загуби правото на сопственост, а судиите во Москва утврдија дека палатата треба да им припадне на кредиторите во Русија.
Во борбата за егзистенција, Александра мораше да го даде на аукција целиот мебел, а денес живее под кирија во стан во Лондон, каде започна сопствен бизнис за внатрешно уредување.
Како што може да се види, новиот стан е далеку од луксузните јахти, приватните авиони, вилата во Сен Барт или замокот во Челзи, но сепак е дом.
Александра од врската со Пугачев има три деца: Аљоша, Иван и Марија, кои сега живеат со неа.
Во продолжение неколку интересни факти за Александра и Сергеј:
Сергеј Пугачев некогаш бил сопственик на две големи бродоградилишта, најголемиот рудник во светот, како и повеќе недвижни имоти во Москва и Санкт Петербург. Тој исто така е еден од основачите на Межпромбанк (Меѓународната индустриска банка) во Москва.
Пугачев бил сметан за „банкарот на Путин“ и бил познат по тоа што бил во добри односи со рускиот претседател.
Александра и Сергеј се запознале во 2008-ма година, кога таа требало да го подучува англиски јазик банкарот на Путин. Таа признава дека тие веднаш се вљубиле еден во друг.
Една година по запознавањето Сергеј и Александра веќе имале едно дете, а таа била бремена со второто.
Александра признава дека за време на бракот со Сергеј, тој само ѝ ја давал неговата кредитна картичка, а таа одела во шопинг каде што ќе посака, па понекогаш дури и со приватниот авион што постојано ѝ бил на располагање.
Тие живееле на нивните три имоти што се наоѓале на релација Лондон, Москва и Париз.
Во 2011-та година Пугачев бил обвинет дека ја оштетил Руската Федерација за две милијарди долари, па во тој миг, бајката на руската грофица се претворила во пекол.
По обвинението за нејзиниот сопруг на Александра ѝ биле ограничени неделните трошоци на 13.000 долари – а таа тврдела дека е невозможно да преживее со тој износ.
Руските власти се обиделе да го уапсат Пугачев со помош на британските служби, поради што тој решил да побегне во Франција.
Александра тогаш опишуваше дека нејзиниот поранешен сопруг се обидувал да ја присили да отпатува заедно со него, но по долгите години поминати во страв, одлучила да му се спротивстави и да остане со децата во Лондон.
Откако биле избркани од палатата во Лондон, Александра и децата со месеци живееле со куфери кај пријатели.
Сега Александра редовно споделува фотографии од едноставниот живот што го водат таа и нејзините три деца во Лондон.
Б. С. Б. | Црнобело
Би можело да ве интересира:
Препорачуваме
Најчитани неделава
