Спасувачи на плажа секој ден носеле 95-годишна жена на раце до нејзината лежалка додека била на одмор

Детали

вторник, 11 јануари 2022

Кога 95-годишната Доти сфатила дека не може да оди на плажа бидејќи се движи со инвалидска количка, тамошните спасувачи веднаш ја понудиле својата помош и секој ден додека траел нејзиниот одмор, на раце ја носеле до лежалките.

Спасувачи на плажа во Алабама, САД, вистински се потрудиле да ѝ го разубават одморот на 95-годишна жена, и тоа само поради нивната добрина.

Во октомври минатата година, 95-годишната Доти Шнајдер била на одмор во Алабама заедно со нејзината ќерка. Но, веднаш сфатиле дека Доти нема да може да оди на плажа.

Доти не може да оди, па користи инвалидска количка, а на плажата немало никакви платформи по кои би можела да ја вози.

Додека Доти и нејзината ќерка Кејт стоеле пред плажата и размислувале што да прават, ги здогледал еден од спасувачите и веднаш им понудил помош.

Прво момчето ја извозело Доти со неговото возило за патролирање на плажата, а кога стигнале до брегот, ја кренал и ѝ помогнал да седне на нејзината лежалка.

По краткиот разговор со Доти и ќерка ѝ, момчето сфатило дека жените ќе бидат таму цела недела. Па, без двоумење, тој им го дал бројот од канцеларијата на спасувачите и им рекол слободно да се јават ако сакаат да одат на плажа и им треба помош.

Следниот ден, Доти и ќерка ѝ повторно отишле на плажа и откако се јавиле, навистина добиле помош од спасувачите.

„Засекогаш ќе им бидеме должни на овие момци. Тие направија мајка ми да се чувствува посебно. Воопшто не се однесуваа како да им е товар. Беше волшебно, поубаво отколку во Дизниленд. Тие се однесуваа прекрасно со мајка ми и вистински се грижеа за неа“, вели ќерката за целото искуство.

Спасувачите направиле и неколку фотки со нивната нова пријателка и ги споделиле на официјалниот Фејсбук профил на компанијата за којашто работат.

„Спасувачите се слуги на јавноста и не можеме да бидеме посреќни што ја нудиме оваа услуга. Госпоѓа Доти Шнајдер неодамна нè посети на 95-годишна возраст и се надеваше дека ќе ужива на плажата, но не можеше сама да оди низ песокот.

Секој ден, цела недела, нашите спасувачи се сретнуваа со Доти и ѝ помагаа да стигне до лежалките на плажата, а потоа ја враќаа назад. Нејзиното семејство ни се заблагодари на крајот од неделата со фрижидер полн храна“, стои во описот.

Навистина прекрасен гест кој сигурно ѝ значел многу на Доти.

Спирова С. | Црнобело