Две години од трагичната смрт – откриена статуа од Коби и ќерката Џиџи на местото на несреќата (фото)

Детали

четврток, 27 јануари 2022

По повод втората годишнина од смртта на Коби Брајант и неговата 13-годишна ќерка, на местото на хеликоптерската несреќа беше откриена статуа од нив двајца прегрнати. Артистот планира да ја поставува статуата на истото место секоја годишнина, како и за роденденот за Коби, а вели дека веќе работи на поголема верзија која ќе биде перманентно инсталирана.

Поминаа две години од трагичната смрт на познатиот кошаркар Коби Брајант и неговата ќерка. Кошаркарот, 13-годишната Џиана (Џиџи) и уште шест лица загинаа во хеликоптерска несреќа која се случи на 26 јануари 2020 година.

По повод втората годишнина од тажниот настан, на местото на несреќата беше откриена статуа од кошаркарот и неговата ќерка. Статуата се наоѓа во планинската област на Калабасас во Лос Анџелес.

Статуата на Коби го „носи“ дресот на Lakers со бројот 24, а до него стои Џиана која држи баскет. На скулптурата се изгравирани имињата на сите загинати, како и зборовите:

„Хероите доаѓаат и си одат, но легендите остануваат засекогаш“.

Според артистот Ден Медина скулптурата ќе остане на местото на несреќата во текот на целиот ден, но нема постојано да биде таму. Скулпторот откри дека планира да ја поставува статуата на местото на трагедија на секоја годишнина, како и на роденденот на кошаркарот.

Тој сподели и дека работи на иста статуа со реална големина која ќе биде висока околу 2 метри.

„Сметам дека нешто вакво треба да биде перманентно. Сакам да ја донирам и да најдам начин да биде перманентно на ова место“, вели артистот за TMZ Sports.

Скулпторот вели дека кога последен пат го посетил местото на несреќата, видел само карпи и цвеќе оставено од фановите, но смета дека Коби и Џиана, како и сите загинати заслужуваат многу повеќе.

Скулпторот лично го познавал Коби и вели дека бил многу повеќе од кошаркар - бил истакнат интелектуалец, добар музичар и одличен татко.

„Секојпат кога ќе прочиташе книга, се обидуваше да го контактира авторот. Зборуваше многу јазици, а сам научи како да свири пијано“.

Засега сопругата на Коби нема споделено ништо за годишнината од смртта, но социјалните мрежи се преплавени со пораки од фановите, колегите и пријателите на кошаркарот.

Коби Брајант имаше 41 година на денот на смртта и на кобниот ден со ќерка му Џиана оделе на турнир во кошарка за млади. Хеликоптерот се сруши откако пилотот налетал на густа магла и удрил во околните ридови.

Според досегашните наоди, најверојатно пилотот бил одговорен за несреќата бидејќи донел неколку погрешни одлуки.

Сопругата на Коби, Ванеса, започна тужба против неколку полицајци кои наводно споделувале и покажувале фотографии од местото на несреќата и сега бара оштета од нив. Судењето е закажано за 22 февруари годинава.

Поради ова, Ванеса стравуваше дека онлајн ќе почнат да се објавуваат фотографии на кои се гледаат мртвите тела на нејзиниот сопруг и нејзината ќерка.

Спирова С. | Црнобело