Највисокото куче во светот – висина од 1 метар, јаде 12 шолји храна дневно и пие вода од кујнскиот мијалник (фото)

Детали

понеделник, 09 мај 2022

Со висина од 1,046 метри, кучето Зевс од Тексас е највисокото во светот, а неговите сопственици велат дека се чувствуваат како со нив да живее уште еден човек.

Куче од расата германска дога (Great Dane) неодамна беше прогласено за највисокото живо куче од страна на Гинисовата книга на рекорди.

Кучето, кое се вика Зевс, е високо дури 1,046 метри кога стои на четири нозе.

Британи Дејвис од Тексас е неговата сопственичка која вели дека Зевс не престанал да расте откако почнала да се грижи за него.

Британи го зела Зевс кога тој имал само осум недели и иако денес тој е огромен, таа вели дека е прекрасно милениче кое одлично се согласува со нејзините други кучиња, како и нејзината мачка.

„Некогаш знае да биде тврдоглав, но многу е мирен. Ги сака сите. Сака да се шета низ соседството и навистина му годи целото внимание. Кога го шетаме, најчесто ги слушаме луѓето како велат ’Леле, тоа е коњ‘“.

Британи и сопругот се родители на две деца, а наводно Зевс бил најблизок со синот тинејџер.

„Зевс и син ми спијат заедно во голем кревет. Нема да ги најдете одвоени. Многу сакаат кога се заедно“, вели Британи.

Денес Зевс има две години, а Британи вели дека воопшто не е евтино да се грижи за толку големо куче.

Наводно, наутро и навечер Зевс јадел по шест шолји сува храна за кучиња, односно 12 дневно. Одвреме-навреме таа му дава и друга храна, како пржени јајца. Британи вели дека омилената ужина му се коцки мраз.

Кога станува збор за вода, Зевс најмногу сакал да пие од кујнскиот мијалник бидејќи може да го достигне без проблем.

Бидејќи Зевс е огромен, Британи вели дека со сопругот и децата се чувствуваат како да имаат уште еден човек во домот, а неретко кучето ја користело неговата големина за да прави бели.

„Сака да ја краде цуцлата на бебето и лесно може да ја украде храната што ја забораваме на шанкот“.

Кучињата од оваа раса се генерално големи – мажјаците во просек достигнуваат висина од околу 86 сантиметри.

Всушност, и претходното највисоко куче во светот беше германска дога, повторно од САД, пред да почине во 2014-та на 5-годишна возраст.

Поради големината, овие кучиња имаат пократок животен век – од 8 до 10 години. Тие неретко се соочуваат со проблеми со зглобовите и коските кои со текот на времето се влошуваат.

Но, Британи вели дека Зевс нема никакви здравствени проблеми и е во толку добра форма, што ветеринарите секојпат биле воодушевени. 

Спирова С. | Црнобело