Понуда од соништата: Италија плаќа 15.000 евра за да се преселите на идиличниот остров Сардинија

Детали

среда, 24 август 2022

Замислете си реновирате стара живописна куќа во некое италијанско селце на магичната Сардинија, каде има повеќе од 1.600 километри песочни плажи и живеете таму... Звучи бајковито, зарем не? Сега е возможно! Кои се условите?

Властите во Италија нудат грантови (финансиска помош) и до 15.000 евра на луѓето кои се подготвени да се преселат на прекрасниот италијански остров Сардинија.

Одвоени се милиони за покревање на иницијатива за заживување на руралните делови на Италија и подобрување на трговијата во малите делумно напуштени места. Ова важи и за напуштените делови од Сардинија.

Сардинија е втор најголем остров на Медитеранот и има неверојатна природна убавина и богата историја.

Има повеќе од 1.600 километри песочни плажи, живописни пристанишни гратчиња и ѕидини изградени многу, многу одамна кои раскажуваат приказни за минатите времиња.

Но, како и многу други региони во Италија и овој регион страда од недостиг на популација поради отселувањето на младите да работат во поголемите градови.

Сега, власта нуди грантови за да ги охраби луѓето да купуваат имоти таму и да ги реновираат и да започнуваат свои бизниси за да ги заживеат напуштените италијански села на Сардинија.

Услов е имотот кој ќе го купите да биде во општина со помалку од 3.000 жители. Плус, ако не успеете со тие пари да ја завршите реновацијата, ќе треба да додадете финансиски средства.

Исто така, услов е да останете да живеете таму постојано, а не само да ја искористите понудата за да си направите вила за летување.

Треба да имате под 40 години и да планирате отворање на свој бизнис таму или да се занимавате со некоја од професиите за кои има дефицит.

С. С. | Црнобело / фото: depositphotos.com