„Му дозволив на синот да си ги лакира ноктите, соучениците го задеваа“ - Татко го подели мислењето на јавноста

Детали

среда, 09 ноември 2022

Татко од САД му дозволил на 6-годишниот син да си ги лакира ноктите, но го подели мислењето на јавноста – некои сметаат дека не е во ред, додека други веруваат дека е бесмислено работите да се делат на „машки“ и „женски“.

Американецот Даг Вивер го подели мислењето на јавноста откако сподели видео на ТикТок во кое открива дека му дозволил на синот да си ги лакира ноктите.

Во видеото кое има над 1 милион прегледи, 34-годишниот татко вели дека неговото 6-годишно синче било исмејувано од некои соученици, но дека смета дека не погрешил што му дозволил да си ги лакира ноктите.

„За време на викендот синот сакаше да си ги лакира ноктите. Па, му ги лакиравме. Во понеделник си дојде од училиште и ни кажа дека три деца од неговиот клас му рекле дека лаковите се за девојчиња. Тој им рекол дека ништо не е само за момчиња или девојчиња.

Па, го прашав: 'Што ти рекоа на тоа?' Тој ми рече дека две деца не му верувале, но едно му поверувало. И, тоа почнало да им кажува на другите дека е во ред и момчињата да си ги лакираат ноктите“.

Потоа таткото истакнува дека од 11 деца во класот, само три прокоментирале за лакираните нокти на синот. Останатите не ни забележале.

„По ова, со синот разговаравме за тоа дека секогаш ќе има некој кој ќе сака да промени нешто кај него. Но, за секој таков човек, има двајца, тројца, четворица кои ќе го сакаат таков каков што е.

Му кажав дека некогаш луѓето кои се најзлобни, зборуваат најмногу и најгласно“.

@dougweaverart Nothing is just for boys or just for girls, y’all! #masculinity #parenting #dadlife ♬ original sound - dougweaverart

Видеото на Даг разгоре жестока дебата во коментари, по што тој говореше за оваа тема и во интервју на Good Morning America, каде што откри дека не е првпат синчето да посака да му ги лакираат ноктите.

„Сме разговарале за ова и претходно. Но, ова е првпат некој да го задева за тоа. Си ги лакираше ноктите и во градинка, и на никој не му беше грижа.

Изгледаше како на сите да им се допаѓа. Но оваа година, во прво одделение, се чини дека повеќе и повеќе деца се свесни за социјалните норми и пробуваат да ги наметнат“.

Некои сметаат дека Даг е одличен татко штом ја поттикнува креативноста на неговиот син:

„Не можам да престанам да плачам. Ти си прекрасен татко и ова е прекрасно“.

„И мојот син сакаше да си ги лакира ноктите. НИКОЈ не го малтретираше на училиште. Само едно дете го праша зошто, и син ми му одговори бидејќи така сака“.

„Не сфаќам како е во ред за девојчињата да сакаат машки работи, но момчињата не можат да сакаат женски работи. Сето тоа се само предмети. Лично не гледам никаков проблем“.

„Има шест години. Ако сака да носи лак – нека носи. Мојот син се чувствува изоставено покрај многуте сестри кога им ги лакирам ноктите, па му ги лакирам ноктите на нозете. Нема ништо лошо во тоа“.

Но, други веруваат дека треба да се постави граница помеѓу „машки“ и „женски“ работи:

„Имам четири синови и четири ќерки и мислам дека момчињата не треба да си ги лакираат ноктите“.

„Како родител, твојата задача е да го спречиш син ти да прави работи поради кои можат да го малтретираат. Не им давај можност на другите деца да го задеваат твоето“.

„Ова е уништување на моралот и вредностите и голема криза на идентитетот. Верувам дека има многу луѓе кои сметаат дека ова е погрешно, но страв им е да не создаваат конфликти“.

На овие коментари, Даг вели:

„Моето прашање е зарем не гледаат колку е смешно тоа што имаат претпоставки и се гневни за 6-годишно момче кое има малку боја на ноктите?“

Што мислите вие? Дали е во ред момчињата да си ги лакираат ноктите доколку сакаат, или тоа сепак е само „женска“ работа?

Спирова С. | Црнобело