Жена која пред 51 година била киднапирана од дадилката, конечно ги најде родителите (фото)

Детали

вторник, 29 ноември 2022

Благодарение на ДНК анализите обезбедени од компанија во САД што им овозможува на луѓето да ги најдат своите предци, 53-годишна жена конечно го најде своето семејство, откако на возраст од 1 година и 10 месеци била киднапирана од дадилката – за неа ова е божиќно чудо.

Мелиса Хајсмит (53) од Тексас, САД била киднапирана во 1973-та година, на возраст од речиси 2 години, од страна на една жена што се претставила како дадилка, а израснала како Мелани Мијоко.

По 51 година и по направениот ДНК тест таа конечно ги запозна своите блиски и дозна дека целиот живот нејзиното семејство трагало по неа.

Таа за американските медиуми ја раскажува својата тажна приказна, и вели дека детството со жената што ја киднапирала воопшто не било лесно.

Пораснала на само 10 минути пешачење од домот од каде што била киднапирана, а со жената што ја израснала никогаш не биле блиски.

„Целото време додека бев таму, имав тешко детство.

Не смеев да излезам надвор и да си играм и таа постојано ме штитеше. Ми велеше дека причината заради која ме заштитува е затоа што сум била родена дома и дека имам оштетување на мозокот.

Се прашував: ’Зошто ме родила, кога не ме сакала?‘“ – вели таа.

Кога била тинејџер, Мелиса побегнала од дома, а вели дека од пред неколку дена во целост ја прекинала комуникацијата со жената што ја израснала.

Нејзиното биолошко семејство никогаш не се откажало од потрагата по загубеното девојче, но нејзината мајка Алта Апантенко (73) вели дека потрагата долга 51 година воопшто не била лесна:

„Моето семејство веруваше дека таа сè уште е жива и јас сакав да верувам, но многупати се разочарав па затоа овојпат им реков да не ме мешаат.

Им реков на другите да прават што сакаат но да не ме мешаат. Јас сакав да заборавам, но тие не се откажуваа“ – вели мајката.

Сестрите и братот на Мелиса, Ребека (48), Викторија (47), Шерон (45) и Џеф (42) се обиделе со помош на ДНК анализи да ја најдат својата сестра, а потоа ја нашле на Фејсбук и побарале од неа да се најдат.

Мелиса досега се видела со нејзините родители, како и со братот Џеф и сестрата Викторија, а со другите членови на семејството ќе се запознае за претстојните празници.

„Се радувам на тоа што конечно ќе ги запознаам сите. Ќе биде потребно да се навикнам на тоа дека имам толку големо семејство, откако пораснав сосема сама“ – вели Мелиса.

Инаку, членовите на нејзиното семејство сега бараат начин жената што ја киднапирала да биде казната, иако според законите во Тексас, делото се смета за застарено затоа што од денот на киднапирањето се поминати повеќе од 48 години.

Б. С. Б. | Црнобело