Трогателно писмо од тинејџерка, која преживеала благодарение на трансплантација на срце од 19-годишна девојка

Детали

среда, 28 декември 2022

„Ова е денот кога ми беше дадена втора шанса за живот и денот кога нечие дете, тетка, братучетка ми го даде своето срце на мене. Се надевам дека мојата приказна ќе инспирира барем една личност да размисли за донација на органи“, вели Кејли Левелин (15) од Велика Британија и сака да ја подигне свеста за донирање на органи.

Кејли Левелин (15) e тинејџерка од Велика Британија која преживеала благодарение на трансплантација на срце кое го добила од прерано починатата Синед Бри (19), девојка со која воопшто не се ни познавала.

Таа страдала од кардиомиопатија, болест на срцевиот мускул која ја отежнува работата на срцето, односно пумпањето крв низ телото.

Тинејџерката, 3 години по трансплантацијата, вели дека иако срцето го добила од комплетен странец, сега во себеси ја чувствува блиска Синед и затоа одлучила да испрати писмо до нејзиното семејство.

Во трогателното писмо таа пишува дека во секое насмеано лице на светов гледа како светлината на Синед уште блеска.

Нејзиното писмо на третата годишнина од трансплантацијата гласи:

„Денешниов ден ми враќа толку многу емоции и тешко е тоа да се опише со зборови.

Ова е денот кога ми беше дадена втора шанса за живот и денот кога нечие дете, тетка, братучетка ми го даде своето срце на мене.
Ова е денот кога започнав ново поглавје во животот. Денот кога го славиме подарокот наречен живот и оддаваме почит на Синед и нејзиното семејство.

Синед, можеби не бевме на иста патека пред тоа, но денес ти чекориш со мене.
Се надевам дека нашата приказна ќе инспирира барем една личност да размисли за донација на органи.

За донорите таму, живи и починати, вие сте вистинските херои.“

Инаку, Синед, донорот на Кејли починала на само 19 години.

Синед

Нејзиното семејство прифатило да се сретне со Кејли и нивната средба била навистина емотивна.

„Навистина беше емотивно да ја видиме Кејли за првпат. Знаеме дека дел од Синед живее во неа. Таа донираше органи на 4 луѓе, таа спаси 4 животи.

Синед сакаше да работи во полиција и да им помага на деца и ако има задгробен живот јас верувам дека оттаму сега се грижи за Кејли. Таа сакаше да им помага на другите“, изјави таткото на Синед.

Кејли поминала 100 дена во болница, пред да ѝ биде направена трансплантацијата во 2019 година.

С. С. | Црнобело