Каде се и што прават денес членовите на групата „Магија“?

Детали

среда, 06 септември 2023

Јован Јованов е во Канада, Зоки Стаменковски во Сиднеј... Каде се и што прават денес членовите на групата „Магија“?

Беше лето 2001-ва година... Се сеќавам кога момците од групата „Магија“ дојдоа и направија концерт во малиот град каде што растев, како дел од нивната голема концертна турнеја.

Со музиката која потсетуваше на големите хитови на Backstreet boys и New Kids On The Block, сите тинејџери/ки лудуваа по нив, а сценските настапи со брзи танчарски движења брзо ја освојуваа публиката.

Имавме нивни касети, нивни постери, ги читавме нивните интервјуа...

Ех, поминаа 22 години оттогаш. Па, верувам дека многумина, исто како мене се прашуваат каде се и што прават момците од групата „Магија“, која мора да признаете дека своевремено донесе едно вистинско освежување на македонската музичка сцена и по примерот на звучните светски имиња креираa модерна музика која се пушташе во сите дискотеки и клубови?

„Магија“ , „ДЈ“, „Светло се гасне“, „Помислувам на тебе“, „Низ оган да минувам“, „Кажи ми“... Ова се само некои од нивните големи хитови.

Групата „Магија“ беше составена од Јован Јованов, Дамјан Лазаров, Зоран Стаменковски и Дони Марџиев.

Групата постоеше од февруари 1998-ма до септември 2001-ва. Основач на групата и автор на песните беше Јован Јованов.

Да погледнеме, како изгледаат денес членовите на групата:

Јован Јованов

За Јован Јованов не треба премногу да се зборува. По распаѓањето на групата, тој продолжи да ја гради својата успешна музичка кариера и да пишува голем број хитови.

Во 2014-та година, Јован со семејството одлучи да си замине од Македонија и се пресели во Канада, каде продолжи да се занимава со музика, а досега повеќепати бил номиниран за најдобар музички продуцент од страна на Hollywood Music in Media.

Дамјан Лазаров

Слично како Јован Јованов и Дамјан Лазаров продолжи да се занимава со создавање музика. Но, по распаѓањето на групата Дамјан избра да остане подалеку од сцената и да работи на нови музички проекти во заднина.

Тој беше автор на музиката и аранжманот на песната на Ѓоко Таневски од 2019-та година, „Тој што во срце те носи“.

Дони Марџиев

Според објавите на социјалните мрежи, Дони Марџиев денес живее во Скопје со семејството, но не се занимава со музика.

Како што може да се види од фотките, одреден период живеел во Холандија, по што повторно се вратил дома.

Зоран Стаменковски

По распаѓањето на групата „Магија“ Зоран ја продолжи соработката со Јован Јованов, а во 2006-тата година тој ја испеа песната „Сè на свое место“, која го освои третото место на „Макфест“.

Зоки денес живее и работи во Сиднеј со сопругата, каде редовно настапува во барови и локали.

https://www.youtube.com/watch?v=QfC4L-J8rbA

Б. С. Б. | Црнобело