Во мистериозниот свет на женската психологија: За кого се облекуваме?

Замислете си ја следнава ситуација. Се подготвувате за вечерно излегување со вашите пријателки. Ќе одите на вечера, можеби еден коктел, можеби два, можеби ќе завршите во некој ноќен клуб. Ladies night и нема правила нели? 

Започнувате да се подготвувате, се мислите што и како да облечете, со што да искомбинирате, па можеби новиот фустан нема да ви одговара со омилените потпетици, па можеби ќе треба да играте, а новите потпетици не се соодветни за такви подвизи. Хм... Одлуки, одлуки... Понекогаш е толку тешко да одлучиш што да носиш, што на крај завршуваш со стариот, но добар евергрин „Немам што да облечам“.

И иако тоа никогаш не е така, интересен е феноменот кој ви го предизвикува тоа чувство. А тоа е длабоко поврзано со насловот на овој текст - ЗА КОГО СЕ ОБЛЕКУВАМЕ?

Многу често се вели дека жената се облекува за да добие внимание од спротивниот пол. Но, мојата феминистичка природа секогаш ја мрази оваа фраза. Лично јас никогаш не би се облекла за да привлечам внимание на друга личност, без разлика дали се работи за спротивниот пол или припадничка на женскиот.

Не можам да го оспорам фактот дека има многу жени кои сè уште се облекуваат само за да привлечат туѓо внимание. Што е погрешно на толку многу нивоа. Но, без разлика која е вашата причина, науката вели дека најголем процент од женската популација се облекува само за да го привлече вниманието на припадничките од истиот пол. Повеќе сакаме кога некоја жена ни љубомори на нашиот изглед отколку нашиот партнер да каже дека изгледаме неверојатно.

Ама искрено мојата цел не е ни едното ни другото. Напротив, никогаш не треба да дозволиме туѓите мислења да го диктираат начинот на којшто се облекуваме. И повеќе од тоа никогаш не треба да дозволиме туѓите мислења да го диктираат начинот на кој се однесуваме.

Доколку се цензурираме и не дозволуваме да блеснеме во нашиот потполн сјај тогаш која е целта? Каков би бил нашиот живот ако се ограничуваме поради туѓите мислења?

Не знам која е вашата причина и приказна за вашиот стил, но мојата е едноставна, сакам мода, сакам интересни и единствени парчиња и воопшто не ми пречи ако некој „лаик“ ме нарече луда. Светот на модата знае да биде луд и тоа во многу добра смисла.

Единствено што би сакала да предочам со моите зборови е дека не смеете да дозволите никој да ви се меша во вашиот личен стил. Сепак тој е ваш и прави да сте уникатни. Не треба да слушате туѓо мислење, а уште помалку да дозволите да влијае на вашите одлуки.

Живејте го животот бестрашно и според вашите правила. Нека биде само ваш.

К. Д. | Црнобело