„Имав среќа што ја пронајдов да ме трпи“! А таа со што заслужи казна како тебе - си се прашал?

Тој беше прекрасен за себе и за сите други, само не за жената што го сакаше со целото свое срце.

Прекрасен човек е тој, за себе и за сите околу него... Со душа широка, со забавен карактер со константна подготвеност за авантури, со желба да помогне и со невиден апетит за успех. Прекрасен за сите, но со исклучок на неа, дали кажав?

Со исклучок на неговата сопруга која веќе две децении му е најголемата поддршка, која ги трпи сите негови испади, која го чека во ноќите и која му е комплетно посветена во деновите. Тој пак е добар за сите, само лош за неа.

Секогаш му е на последното место. Како боксирачка вреќа на која ги истура емоциите и чие присуство го зема здраво за готово во својот живот.

Додека шета со други по кафеани до рано наутро – таа го чека, додека брка бизнис зделки – таа го чека, додека нема време за своите деца – таа го разбира, додека другите го осудуваат за третманот кон неа – таа го оправдува. Но, не заслужува оправдување!

Не му се доволно оправдание зборовите „Жена ми е ангел, имав среќа што ја пронајдов да ме трпи“. Па, размислете само колку тони себичност содржат овие зборови?

И во ред е вербалното давање на признание, но ако некој е свесен дека некому нанесува болка и не презема ништо во врска со тоа, не е во ред, зарем не? Па, дали таа е родена за тебе да те трпи? Дали љубовта значи трпење или тука има и компромиси и давање и разбирање?

Тој секогаш е ѕвездата која мора да биде во главен фокус на секој настан, а таа негова сенка. Секогаш подготвена да му биде ветер во грбот и секогаш полна со прошка и разбирање.

Од друга страна, тој никогаш не жртвувал ништо во име на неа и на заедницата со неа. Дури како од него да зрачи ставот дека е со неа само затоа што ниту една друга не би го трпела.

Зарем жената која најискрено знае да сака заслужи вака да биде казнета? Или така е тоа во животот, добрите секогаш го извлекуваат подебелиот крај. Изгледа тоа што знае да премолчи и проголта и се удри од глава.

Нејзиниот самозаљубен партнер верувам дека никогаш нема да ја сака ниту половина од тоа што се сака себеси. Верувам дека картите да беа поинаку поделени во животот и тој да се најдеше во нејзина кожа ќе избегаше уште на првата годишнина од брак. Верувам дека не е свесен дека да се биде со него е казна, но некој го сака премногу и оди против себе во име на љубовта.

Верувам дека ќе го сфати тоа дури тогаш кога сите нејзини граници на толеранција ќе бидат преминати и таа ќе замине. Верувам дека ќе биде предоцна и дека на сите ќе им раскажува имав среќа што ја имав, но бев глупав што не ја ценев. Верувам, вистински и од срце верувам, дека таа конечно ќе се освести...

©CRNOBELO.com Забрането преземање и копирање. Крадењето на авторски текстови е казниво со закон.

Автор: С. С. | Црнобело